Oğurluğa haqq qazandıranlar, yoxsa “OBA”-nın doğru addımı?..
Orta məktəbdə oxuyanda ingilis dili dərsində sinfimizdə bir uşağın çantasından nəsə oğurlanmışdı. İngilis dili müəllimimiz Suratel müəllimə idi. O, heç kimin çantasını yoxlamadı, amma bizə bir ingilis məsəli danışdı. Dedi ki, İngiltərədə məşhur bir oğrunu tutub ölüm cəzası verirlər. Ondan son istəyini soruşanda deyir ki, anamı çağırın, onu son dəfə öpmək istəyirəm.
Nə isə, anası gəlir. Oğlan anasını öpəndə onun dilini dişləyib qoparır. Soruşurlar ki, niyə belə etdin? Dustaq deyir:
“Mən ilk dəfə orta məktəbdə sinif yoldaşımın çantasından nəsə oğurlayanda anam heç nə demədi. Daha sonra mağazadan ərzaq oğurladım. Anam bunu biləndə oğurladıqlarımı gördü, amma mənə bir söz demədi, hətta oğurladıqlarımı sevinclə qəbul etdi. Sonra bankları soydum, insanları qarət etdim. Yenə anam susdu, mənim etdiklərimə göz yumdu. Əgər anam ilk dəfə sinif yoldaşımın çantasından oğurluq etdiyimi biləndə ‘Oğlum, olmaz, bu, pis şeydir’ desəydi, məni düzgün yola gətirsəydi, bu gün edam edilməzdim.”
Bu misalı çəkməyimin səbəbini izah edim…
Bayaq Facebook-da “Oba” marketdən oğurluq edən uşaqla bağlı yazını oxudum. Uşağın oğurluq etməsi kənarda qalıb, bəziləri, ola bilsin ki, kimlərinsə diqtəsi ilə “Oba” marketi qınayır və ictimai rəyi yanlış istiqamətə yönəltməyə çalışırlar.
Hətta bir dostumun paylaşımına rəy də yazıb uşağın valideynini qınadım. Çünki övladının dəfələrlə marketdən oğurluq etməsinə göz yumaraq, valideyn özü də böyük səhv edib. Məşhur filmdə deyildiyi kimi, “söhbət iki kilo sosisdən getmir”. Bu uşaq xırda-xırda oğurluq edib və axırda mağazaya 300 manatlıq ziyan vurub. Mənim oğlum vaxtilə bir marketdə işləmişdi. Oradan bilirəm ki, mağazanın kassasına daxil olan hər qəpik diqqətdədir.
Bəs bu mağazada işləyənlərin, mağazanın müdirinin günahı nədir ki, bir uşağın hərəkətinə görə işindən olsun? Onların da evində uşaq var axı.
Nəymiş, valideyndən dəymiş zərərin ödənilməsi tələb olunub. Bəs nə etməliydilər? Uşağı oğurluq edən valideynə təşəkkür etməliydilər?
Əslində, həmin uşağın valideyni “Oba”ya təşəkkür etməliydi ki, oğurluq etdiyi üçün polisə şikayət etməyib, görüntüləri paylaşmayıb, məsələni yerində həll etməyə çalışıb. Amma görünür, valideyn də uşağı kimi oğurluq etməyə, pis işlərə meyillidir ki, övladını tənbeh etmək əvəzinə məsələni sosial şəbəkələrə çıxarıb, guya “Oba” marketlər şəbəkəsini biabır etməyə çalışıb. Necə deyərlər, üzrü günahından da betərdir.
Bizim camaata bir bəhanə lazımdır. Dərhal “Oba”nı hoydu-hoyduya götürdülər. Sanki “Oba” bu oğurluğa göz yummalıymış. Adətkar olmuşuq axı: heç nədən, adi bir oğurluq hadisəsinə görə şirkətləri, mağazaları və təşkilatları linç etməyə çalışırıq.
Özümüzün deyil, axı…
//İltifat Hacıxanoğlu







