Ehtiram Şahverdiyev: "90 dəqiqə döyüşdük, bircə qol gəlmədi"
Dünən futbol üzrə Azərbaycan Premyer Liqasında XX tura yekun vurulub. "Kəpəz" XX turda nə qədər mübariz oyun sərgiləsə də, "Səbail"dən xal ala bilmədi. "Dənizçilər" Nizami yurdunun təmsilçilərini 1:0 hesabıyla məğlub etdi. Qarşılaşma ilə bağlı "sarı-göylər"in üzvü Ehtiram Şahverdiyev fikirlərini Strateji.az saytı ilə bölüşüb.
-Ehtiram, bir xal götürmək üçün oyunda nə çatmadı?
-"Səbail" ilə oyuna son dərəcə ciddi hazırlaşmışdıq. Bu gün meydanda nə qədər döyüşsək də, bizə lazım olan qolu vura bilmədik. Rəqib də yaxşı müdafiə olunaraq boşluqlar vermədi. İstənilən halda artıq bu matçı unudub irəli baxmalıyıq.
-Səncə, "Turan Tovuz"a qalibiyyətdən sonra komandada arxayınlıq varmı?
-Xeyir, arxayınçılıqdan söhbət gedə bilməz. Ola bilər ki, müəyyən qədər yorğunluq vardı. Amma reallıq odur ki, biz 90 dəqiqə döyüşdük, bircə qol gəlmədi.
-Çempionatın ilk yarısı ilə müqayisədə hazırda performansında irəliləyiş varmı?
-Özüm barədə çox fikir bildirməyi xoşlamıram. Qısaca onu deyim ki, daim üzərimdə çalışmalıyam.
-Komandanızda yeni transferlər var. Onlar komandaya fayda verə biləcəklərmi?
-Hələ bizə yeni qoşulublar, amma inanıram ki, qarşıdakı turlarda onlar daha yaxşı çıxış edəcəklər.
//Abdulla İsmayıloğlu, Strateji.az







