Sergey Samok: “Mən istənilən halda oyuna hazıram”
Xəbər verdiyimiz kimi , geridə qoyduğumuz həftədə də Azərbaycan Premyer Liqasının XX turu çərçivəsində "Turan Tovuz" səfərdə “Qarabağ”ı məğlub etməklə sensasiyaya imza atmışdı. Həmin qarşılaşmada "Boz qurd"un qapısını Sergey Samok qoruyurdu. Qolkiper həm matç, həm də komandasındakı atmosferlə bağlı Strateji.az saytına danışıb.
-Sergey, XX turda güclü “Qarabağ”ı məğlub etməklə sensasiyaya imza atdız. Həmin oyunla bağlı fikirlərin maraqlıdır...
-Bizim üçün heç də asan qarşılaşma olmadı. Heyətimizdə iki yeni oyunçu – Joarlem Santos ilə Kauan Martins vardı. Bir qədər onlar hələ atmosferə uyğunlaşmamışdı. Həmçinin matçın startı bizim üçün uğurla başlamadı, erkən qol buraxdıq. Amma həvəsdən düşmədik və hakimin final fitinə qədər pressinq tətbiq edib istəyimizə nail olduq.
-Erkən qol buraxmağınızı nə ilə izah edərdin?
-Bir anlıq cərimə meydançasına nəzarəti itirdik , rəqib də bundan istifadə edərək hesabı açdı.
-Oyunun 180 dərəcə dəyişdirəcəyinizə inanırdınmı?
-Biz qələbəyə inanırdıq və bu ümidlə sona qədər xarakter göstərdik.
-Adətən qapıda İvan Konovalovu görürük, "süvarilər"lə qarşıdurmada isə çərçivədə sən idin. Qapı xətdində rəqabət bu qədərmi güclüdür?
-İvanın zədəsi vardı və o həftə ərzində yetəri qədər məşq edə bilməmişdir. Qapıçılarımız arasında kifayət qədər rəqabət var. Buna rəğmən mən istənilən halda oyuna hazıram.
-Altı aydan çoxdur "Turan Tovuz"dasan, həm komandan, həm burda olmağınla bağlı fikirlərini eşitmək istərik…
-Çox mehriban, ünsiyyətçil kollektivimiz var. Bir-birimizə köməyi əsirgəmirik. Qarşımıza avrokuboklara vəsiqə qazanmaq tapşırığı qoyulub və bu yolda hamı məsuliyyətini anlayır. Burda olmağımdan çox məmnunam.
-Çempionatımızda qapıçılardan kimə simpatiyan var?
-Azərbaycan çempionatında yaxşı qapıçılar kifayət qədərdir. Kimisə fərqləndirməyə çətinlik çəkirəm. Bir qədər “Qarabağ” da qolkipelərlə bağlı rotasiya zəngindir. Onların heyətindəki hər bir qapıçı rahatlıqla bir-birini əvəz edir.
-Azərbaycan futbolu rus qapıçılarla zəngindir. Həm yerli ruslarımız Azərbaycan seçməsində çıxış edib, həm də legionerlər çempionatımızı bəzəyib. Elə Lunyov ilə Konovalovun adını çəkmək bəs edir. Premyer Liqamızda həmvətənlərinin top qovması elitamızda çıxış etməyinə təsir edibmi?
-Lunyovun Azərbaycan oynaması marağımı çəkmişdi. Ümumi götürəndə isə Azərbaycan gözəl ölkədir, əhali arasında rus dilini bilənlər də çoxdur, diskamfortum yoxdur. Odur ki, burda karyeramı davam etdirməyimə şadam.
// Strateji.az ABDULLA İSMAYILOĞLU







