Asim Xudiyev: "Azərbaycanlı hakimlərin hamısı Tofiq Bəhramov məktəbini keçib"
Bu gün Azərbaycan futbolunun əfsanələrindən biri, dünya şöhrətli hakim Tofiq Bəhramovun anadan olmasının 100 illik yubileyi şərəfinə onun adını daşıyan "Tofiq Bəhramov adına Respublika Stadionun"da veteran futbolçular ilə jurnalistlər arasında yoldaşlıq görüşü keçirilib. Oyun veteranların 8:3 hesablı qələbəsiylə başa çatıb. Matçdan sonra veteran futbolçu, sabiq FİFA referisi, hazırda isə beynəlxalq dərəcəli hakim-inspektor kimi fəaliyyət göstərən Asim Xudiyev Strateji.az saytına açıqlama verib.
"Tofiq Bəhramov Azərbaycanı və futbolumuzu dünyada tanıdan böyük şəxsiyyətin anadan olmasının 100 illik yubilyini qeyd edirik. Dünən məşhur futbol hakimimizin doğum günü münasibətiylə veteranlarıyla birgə onun qəbrini ziyarət etdik, ardınca da kiçik bir tədbir keçirdik. Bu gün isə Tofiq müəllimin anadan olması münasibətiylə veteran futbolçular ilə jurnalistlər arasında futbol matçı keçirdik. Düşünürəm ki, yaxşı oyun alındı. Azərbaycanlı hakimlərin hamısı Tofiq Bəhramov məktəbini keçib. Bu gündə FİFA dərəcəli referilərimizin əfsanəvi hakimimizin adını yaşadır və Azərbaycanın futbol hakimliyinin beynəlxalq oyunlarda layiqincə təmsil edirlər"-deyə Asim Xudiyev bildirib.
Asim Xudiyev Tofiq Bəhramovla bağlı ən böyük istəyini də dilə gətirib.
"2008-ci ildə Tofiq Bəhramov adına Respublika Stadionunda mərhum referimizin heykəli qoyuldu. Amma bir müddət sonra abidə götürüldü. Hazırda həmin heykəl futbol məkanının köhnə paltardəyişmə otağının qarşısındadır. Arzum budur ki, Tofiq Bəhramovun şərəfinə ucaldılan heykəl yenidən stadionun qarşısındakı öz yerinə qaytarılsın. Həmçinin mən vaxtikə İngiltərə bir neçə dəfə olmuşam. Dumanlı Albionda olduğum vaxtlarda Liverpulda və Londonda futbol muzeylərində olmuşam. Həmçinin İngiltərə Futbol Federasiyasının muzeyində olarkən stadionun muzeyində olarkən 1966-cı ildə Tofiq Bəhramovun laysman kimi təyinat aldığı İngiltərə - Almaniya matçında almanların qapısının dirəkləri və tiri də orda saxlanılır. Həm o şəkili, həm də Tofiq müəllimlə bağlı bir çox nadir şəkilləri fotolarını çəkmişdim. Həmin şəkilləri gələcəkdə jurnalistlərə təqdim edəcəm ki, futbol tariximizin görkəmli nümayənsini yaşadaq". -deyə tanınmış hakimimiz bildirib.
// Strateji.az ABDULLA İSMAYILOĞLU







