Asif Məmmədov: “Bu bizim üçün xəbərdarlıq siqnalı olmalıdır”
I Liqanın lideri "Qəbələ" çempionatın ikinci pərdəsinə uğurla başlamadı. Komanda XII turda doğma divarla arasında "Baku Sportinq"in müqavimətini qıra bilməsə də, XIII turda səfərdə "Difai Ağsu"nu məğlub edə bilib. Son iki matçla bağlı "qırmızı-qaralar"ın ən təcrübəli oyunçusu və kapitanı Asif Məmmədov Strateji.az saytına danışıb.
"Çempionatın ilk turu kimi, qış fasiləsindən sonrakı birinci oyun da həmişə ağır, gərgin keçir. XII turda evdə "Baku Sportinq"i qəbul etdik, çoxsaylı qol imkanlarımız olsa da, son nöqtəni qoya bilmədik və vacib iki xal itirdik. Növbəti turda səfərdə "Difai Ağsu"ya qarşı oyunumuz da çox çətin keçdi. Heç də asan qələbə qazana bilmədik. Son iki qarşılaşmaya nəzər yetirsək, bu bizim üçün xəbərdarlıq siqnalı olmalıdır. Odur ki, iki oyundakı səhvlərimizi, çatışmazlıqlarımızı aradan qaldırmalı və qarşıdakı oyunlara ciddi hazırlaşmalıyıq. Hələ bizi 14 ağır tur gözləyir. XIV turda səfərdə "İmişli"ylə oynayacağıq. Ona görə də həmin görüşə maksimum yaxşı hazırlaşıb qələbə qazanmalıyıq". -deyə Məmmədov bildirib.
//Strateji.az ABDULLA İSMAYILOĞLU







