“Şahmat Akademiyasına böyük ümidlər var”

 Azərbaycan Şahmat Federasiyasının prezidenti Mahir Məmmədov qurumun rəsmi saytının suallarına cavab verib. 

-İcraiyyə Komitəsinin iclasında müzakirə edilən məsələlərlə bağlı fikrinizi öyrənmək istərdik?

-İcraiyyə Komitəsinin 2024-cü ildə ilk iclasında mühüm məsələlər müzakirə edildi. İlk növbədə növbəti konfransın mayda keçirilməsi barədə razılığa gəldik. Gələcəkdə yığma komandaların tərkibinin müəyyənləşməsində Azərbaycan çempionatında iştirakın vacib hesab edilməsiylə bağlı müzakirə oldu. AŞF rəhbərliyi növbəti illərdə bütün aparıcı şahmatçıların ölkə çempionatında iştirakına nail olmağa çalışır. 2025-ci ildən milli komandaların formalaşmasında Azərbaycan çempionatında iştirak amilinin əsas götürülməsini istəyirik. Sözsüz şahmatçının beynəlxalq yarışlarda uğurlu iştirakı, reytinqi də vacibdi. Amma ölkə çempionatında mübarizə aparması da əsas amillərdən biri olacaq.

İclasda peşəkarlıq səviyyəsinin yoxlanılması məqsədilə şahmatı tədris edən məşqçilərin sertifikatlaşdırması məsələsi geniş müzakirə olundu. Vacib məsələlərdən biri İcraiyyə Komitəsinin üzvlərinin federasiyanın komissiyalarının işində iştiraka cəlb olunması idi. Hər bir üzvə müəyyən sahəni həvalə etdik, bundan sonra komissiyaların işi kurasiya olunacaq və birgə çalışacaqlar. 

-Şahmat dünyasının diqqəti Kanadaya yönəlib. Nicat Abasovun çıxışı barədə nə söyləmək olar?

-İddiaçılar Turnirində əsas mübarizə irəlidədir. Biz Nicata uğurlar arzu edirik. İcraiyyə Komitəsinin iclasında şahmatçımızın zəngin hazırlıq mərhələsində iştirakı qeyd olundu. Artıq onun məşqçilərinin adı sirr deyil. Nicatla birgə Torontoya yollanan Şəhriyar Məmmədyarov sekundant-məşqçi kimi Nicata dəstək olur. Hazırlığa istedadlı şahmatçımız Abdulla Qədimbəyli də cəlb olunmuşdu. Dünyanın aparıcı şahmat mütəxəssisləri - Vladimir Çuçelov və Boris Gelfand kimi şahmatda tanınan adlar Nicatın hazırlığında iştirak edib. 

-Vladimir Çuçelov və Boris Gelfand Bakıya səfər zamanı gənc şahmatçılar və qadınlardan ibarət yığmanın üzvləri üçün hazırlıqda iştirak etdilər. Onlarla əməkdaşlıq davam edəcək?

-İlk növbədə Azərbaycanda da təcrübəli məşqçilərin olduğunu qeyd etməliyəm. Yaxşı məşqçilərimiz olmasaydı, bu sayda istedadlı şahmatçılar  inkişaf etməzdi. Bununla yanaşı dünya şahmat təcrübəsi bizə çox vacibdi. Vladimir Çuçelov və Boris Gelfand kimi mütəxəssislərin ölkəmizə səfəri sıradan hadisə deyil. Nicat Abasovun hazırlıq dövrünə təsadüf etdiyi üçün həm onunla təlim-məşq toplanışında iştirak etdilər, həm də gənclərə seminarlar, təkbətək məşğələlər keçirildi. Mütəxəssislərin ikinci səfəri zamanı verilən tapşırıqlara əməl olunması yoxlanıldı, o cümlədən hazırlığın monitorinqi aparıldı. Hal-hazırda Gelfand və Çuçelov şahmatçılarımızla məşqləri həm onlayn, həm də əyani şəkildə davam etdirir.   

-Federasiyanın nəzdində fəaliyyət göstərən Şahmat Akademiyası barədə məlumat verməyinizi istərdik. 

-Ölkəmizin gənc istedadlı şahmatçılarının hazırlığını düzgün istiqamətləndirmək üçün federasiya nəzdində Şahmat Akademiyasının yaranması barədə elan verildi. Akademiyanın işinə böyük ümidlər var. Burada Azərbaycanın tanınmış məşqçiləri müxtəlif yaş kateqoriyalarında gənclərlə təcrübələrini bölüşür. Fərqlənən şahmatçıların yarışlarda iştirakını təmin etmək barədə düşünürük. Ümumiyyətlə şahmatçılara ustalığını artırmaq üçün dövlət və federasiya tərəfindən lazımi şərait yaradılır. Şahmatçılarımızın həm ölkədə keçirilən, həm də beynəlxalq turnirlərdə iştirakı təmin olunur. Azərbaycan çempionatının mükafatçıları dünya və Avropa çempionatlarına ezam edilir. Bundan əlavə müəyyən reytinqə malik şahmatçıların kommersiya turnirlərində iştirakına maliyyə ayrılır.