Kamran İbrahimov: "Qızıla bərabər 2 xal itirdik"
I Liqada çempionluğa iddialı "Karvan" dünən "Cəbrayıl" səfərində vacib 2 xal itirib. Yevlax təmsilçisinin qapıçısı Kamran İbrahimov oyunla bağlı fikirlərini Strateji.az saytına bildirib.
- Matçla bağlı təəssüratların maraqlıdır...
- Bu oyundan məqsədimiz 3 xal idi. Çox çalışdıq ki, meydandan qalib ayrılaq. Bizə lazım olan qolu ikinci hissədə vurduq. Amma qələbə hesabını qoruya bilmədik. Matça əlavə olunan dəqiqələrdə qapımıza təyin olunan penalti qələbəməzin üstündən xətt çəkdi. Gərgin keçən 90 dəqiqə heç-heçə bitsə də, rəqib 1 xal qazandı, biz isə qızıla bərabər 2 xal itirdik.
- Penalti epizoduna yaxın idin. Səncə, hakimin qərarı ədalətliydimi?
- Rəqib futbolçu özü ayağını bizim oyunçuya ilişdirdi. Məncə, referi "11 metrə"ni göstərməyə də bilərdi. Artıq 1:1 hesab qeydə alınıb və matç da bitib. Bizə də hakimin qərarına hörmət etmək qalır.
- Hazırkı performansın haqqında nə deyərdin?
- Səmimi deyim ki, indiki formamdan razı deyiləm. Üzərimdə maksimum işləməliyəm ki, daha yaxşı performans sərgiləyim. Qısası çox çalışmalıyam.
- "Neftçi"nin yetirməsisən və elita təcrübəsinə sahib qapıçısan, hazırda I Liqada çıxış etmək necə hisdir?
- I Liqada çıxış etmək heç də asan deyil. Buranın da özünə görə çətinlikləri var. Həm çempionluğ uğrunda bir neçə komanda mübarizə aparır, həm də futbolçu özünü doğrultmaq üçün maksimum potensialını ortaya qoymalıdır. Sözüm o ki, I Liqa kənardan asan görsənsə də, reallıqda elə deyil.
- AFFA İcraiyyə Komitəsinin məlum qərarına əsasən gələn mövsümdən elitadam12 komanda iştirak edəcək. Bu qərara münasibətin?
- Təqdirəlayiq qərardır. Düşünürəm ki, komanda sayı nə qədər çox olsa, bir o qədər yaxşı olar.
- Komanda sayının artımı qərarı "Karvan" cəbhəsində arxayınlıq yaratmayıb?
- Xeyr, əksinə daha da məsuliyyətli olmuşuq. Bizim əsas məqsədimiz çempion kimi elitaya vəsiqə qazanmaqdır. Bunu reallaşdıra bilməsək vitse-çempion kimi güclülər dəstəsinə yollanmaq istəyirik. Odur ki, birinci və ikinci pillədən başqa digər yerlər haqqında düşünmürük.
// Strateji.az ABDULLA İSMAYILOĞLU







