Emil Qasımov: "Məğlubiyyətə bərabər heç-heçəyə nail olduq"
I Liqanın XV turunda çempionluğa iddialı "Karvan" "ASCO Arena"da dalana dirəndi. Belə ki, "Cəbrayıl" son dəqiqə qolu ilə yevlaxlıların qələbəsini gözündə qoydular və görüş 1:1 hesabıyla başa çatıb. Yevlax təmsilçisinin qol müəllifi, həm komandasının, həm də çempionatın ən sərrast futbolçusu Emil Qasımov Strateji.az saytına müsahibə verib.
-Qarşılaşma ilə bağlı fikirlərin maraqlıdır...
-"Cəbrayıl" səfərinə qələbə üçün gəlmişdik. Çətin oyun alındı. 90 dəqiqədə istədiklərimizin hamısını həyata keçirə bilmədik. Qolumuz gec gəldi, ondan sonra da hesabı qoruyub saxlaya bilmədik.
-Fərqi artırmaq və ya qələbə hesabını qorumaq üçün nə çatmadı?
-Matçın startında istəyimiz yetərli deyildi. Qol vurmağa çalışırdıq, amma bunu üçün alışıb-yanmırdıq. Rəqibə isə əksinə məğlub olmamaq üçün çox motivasiyalıydılar. Onlar son saniyəyə kimi döyüşdülər. Buna görə “Cəbrayıl”ı təbrik edirəm. I Liqada, peşəkarlıq, büdcə ilə yanaşı güclü istək də lazımdır. Bu gün məğlubiyyətə bərabər heç-heçəyə nail olduq. Halbuki, qələbə bizə hava su kimi lazım idi. Bu matçdakı səhvlərimi analiz edib, irəli baxacağıq. Əsas məqsədimiz çempionluq, minimum hədəfimiz isə ikinci pillədəki yerimizi qorumaqdır.
-Səncə, qapınıza təyin olunan penalti ədalətliydimi?
-Epizoda baxmamışam, amma inanmaq istəyirəm ki, referi səhv qərar verməyib.
-Bu gün vurduğun qol ilə çempionatın bombardirlər yarışında hamını qabaqladın. Bu barədə nə deyərdin?
-Qol vurmağıma sevinirəm. Amma başlıcası qol vurmağım yox, “Karvan”ın uğurudur. Odur ki, qollarımı sıralamaqla komandamın qələbəsinə tövhə verəndə özümü xoşbəxt hesab edirəm.
Xatırladaq ki, Emil Qasımov yanvar ayında ən yaxşı qoluyla fərqlənib. Buna görə futbolçu “Ayın qolu” layihəsində də seçildiyinə görə mükafatlandırılıb. Futbolçunu Peşəkar Futbol Liqasının Media və Marketinq Departamentinin direktoru Sənan Abdullayev təltif edib.
// Strateji.az ABDULLA İSMAYILOĞLU







