Tapdıq Əhmədov Təmkin Xəlilzadənin futbol fəlsəfəsindən danışdı
Dünən I Liqada XV tura start verildi. Çempionatın debütantı "Cəbrayıl" doğma divarlar arasında "Karvan"a qarşı əzmkarlıq nümayiş etdirərək ondan bir xal qopara bildi. Qarabağ təmsilçisinin futbolçusu Tapdıq Əhmədov matça bağlı Strateji.az saytına reaksiyasını bildirib.
-Bu gün əzmkarlıq sərgiləyib son anda məölubiyyətdən xilas olduz. Qarşılaşma ilə bağlı təəssüratların maraqlıdır...
-"Karvan" kimi güclü rəqiblə oynamağımıza və qol buraxmağımıza baxmayaraq ruhdan düşmədik və son saniyəyə kimi rəqibə diş göstərdik. Allaha şükürlər olsun ki, əzmkarlığımızın, əziyyətimiz hədər getmədi və bizə lazım olan qolu vura bildik. Qarşıdakı oyunlarda da yaxşı nəticələr qazanmaq istəyirik.
-Qolu penaltidən vurduz. Qarşı tərəf isə “11 metrə”nin ədalətli verilmədiyini israrla qeyd etdi. Səncə, xeyirinizə verlən penalti ədalətliyidimi?
-Oyun anında epizoda yaxın deyildim. Buna rəğmən matçdan sonra epizoda videoda diqqətlə baxdım və futbolçumuzun ayağına təmas var idi.
-“Cəbrayıl” sükanı arxasında Cavid Hüseynov, Azər Nəsirov, Elhad Nəziri, hazırda isə Təmkin Xəlilzadə kimi gənc, enerjili məşqçilərdir. Vaxtilə birgə futbol oynadığın Təmkin Xəlilzadənin komandanıza baş məşqçi təyin olunmasıyla nələr dəyişdi?
-Adlarını çəkilən gənc məşqçilərin hər birinə hörmətim var. Təmkin Xəlilzadəyə gəlincə, onunla birgə “Zirə”də çiyin-çiyinə futbol oynamışıq. Onun necə futbolçu olmağı bütün Azərbaycana bəllidir, artıq şərhə ehtiyac yoxdur. Vaxtilə komanda yolaşım olan, indi baş məşqçimiz Təmkin müəllimdir. Onun gəlişiylə təbii ki, yeniliklər var. Məsələn, Təmkin müəllim “Cəbrayıl”da kollektiv oyun tərzinin formalaşmasında maraqlıdır, kor-koranə hücumların qurulmasını, uzaqdan bəxtə-xuda qapıya zərbələr endirilməsinin, yersiz fərdi oyunların tərəfdarı deyil. Oyunda hər bir futbolçunun ayağına top dəyməsini, ötürmələrdə maksimum dəqiqlik tələb edir. Hücumda və müdafiədə kollektivçiliyin tərəfdarıdır. Bundan başqa hər bir futbolçuya fərdi olaraq yanaşmağı yaxşı bacarır və komandada təcrübəli futbolçuların yer almasında maraqlı olan məşqçidir.
-Qış fasiləsindən sonra komandanız cəmi 2 xal toplayıb. Bunu necə izah edərdin?
-Təbii ki, bu istədiyimiz göstərici deyil. Amma geriliyimizi aradan qaldırmaq üçün maksimum çalışacağıq. Komandamızda komplektləşmə bir qədər güc başladı. İstənilən halda yerimizdə saymağa yox, hər turda əzmkarlıq nümayiş etdirməklə maksimum çox xal toplamağa fokuslanmışıq.
-Səncə, “Cəbrayıl” I Liqada qalmaq uğrunda mübarizədən üzü ağ çıxacaqmı?
-Bunun üçün bütün gücümüzü ortaya qoyacağıq.
// Strateji.az, ABDULLA İSMAYILOĞLU







