Suriya Xarici İşlər Nazirliyindən İsrailə sərt qınama
Suriya Xarici İşlər Nazirliyi İsrailin Suriyaya endirdiyi hava zərbələrini sərt şəkildə qınayaraq, Birləşmiş Millətlərdən təcili tədbirlər görməyi tələb edib. Strateji.az "haberler.com" saytına istinadən xəbər verir ki, hücumlar nəticəsində Hama Hava Limanının dağıldığı, bir çox mülki və hərbi şəxsin yaralandığı bildirilib.
İngiltərədə yerləşən Suriya İnsan Haqları Müşahidə Mərkəzinə görə, İsrailin son hava hücumları 2012-ci ildən bəri ən şiddətli hücumlar kimi qeydə alınıb. Bu hücumlar zamanı Suriya ordusuna məxsus raket anbarları və keçmiş hərbi mövqelər hədəfə alınaraq 75-dən çox zərbə endirilib.
İsrail ordusu isə hücumların yalnız hərbi obyektlərə qarşı yönəldiyini iddia edir. Bununla belə, bölgədəki gərginlik artmaqda davam edir.
Türkiyənin Xarici İşlər Naziri Hakan Fidan da İsrailə çağırış edərək, “Suriyanı bombalamaqdan əl çəkin” mesajını göndərib.
Bu hadisələr bölgədəki vəziyyəti daha da gərginləşdirib və beynəlxalq ictimaiyyətin diqqətini cəlb edib.
//Şəfa Yusifzadə, Strateji.az







