Cənubi Koreya prezident administrasiyasında axtarış aparıldı
Cənubi Koreyada polis 3 dekabr 2024-cü il tarixində tətbiq edilmiş hərbi vəziyyətlə bağlı istintaq çərçivəsində sübut toplama işlərinə dair açıqlama yayıb.
Strateji.az Türkiyənin "Hürriyət" qəzetinə istinadən xəbər verir ki, hüquq-mühafizə orqanları prezident administrasiyası və Prezident Təhlükəsizlik Xidməti (PSS) ofislərinə basqın edərək təhlükəsiz telefon serverləri və müşahidə kameralarını yoxlayıblar.
PSS-in sədr müavini Kim Seong-hoon, bu ilin yanvar ayında keçmiş prezident Yoon Suk Yeol barəsində çıxarılan həbs qərarını həyata keçirməyə maneə törətdiyi üçün saxlanılmışdı.
Xatırladaq ki, o dövrdə prezident olan Yoon Suk Yeol, 3 dekabr 2024-cü ildə "müxalifətin dövlət əleyhinə fəaliyyətlərdə iştirak etdiyini" əsas gətirərək ölkədə hərbi vəziyyət elan etmişdi. Lakin Milli Məclisin səsverməsindən sonra bu qərar ləğv olunub və Nazirlər Kabinetinin razılığı ilə prezident geri addım atmağa məcbur qalıb.
Daha sonra, 14 dekabr 2024-cü ildə Milli Məclisdə keçirilən səsvermə zamanı prezident Yoon-un impiçmenti gündəmə gəlib və o, Konstitusiya Məhkəməsinin qərarı açıqlanana qədər vəzifəsindən müvəqqəti uzaqlaşdırılıb.
//Şəfa Yusifzadə, Strateji.az







