Ukrayna və ABŞ nadir torpaq elementləri üzrə anlaşmaya yaxındır
Ukraynanın iqtisadiyyat naziri və baş nazirin müavini Yuliya Svırydenko bəyan edib ki, Ukrayna ilə ABŞ arasında nadir torpaq elementləri üzrə razılaşma istiqamətində aparılan danışıqlarda "əhəmiyyətli irəliləyiş" əldə olunub. Strateji.az "haberler.com" saytına istinadən xəbər verir ki, o yaxın vaxtlarda rəsmi sənədin imzalanması gözlənilir.
ABŞ-ın sabiq prezidenti Donald Trampın dövründə gündəmə gələn, Ukraynaya göstərilən hərbi yardımlar qarşılığında bu ölkədən nadir torpaq elementləri əldə olunması ilə bağlı razılaşma üzərində işlər davam edir. Yuliya Svırydenko sosial şəbəkədə paylaşdığı məlumatda bildirib ki, tərəflər arasında aparılan müzakirələrdə mühüm irəliləyişlərə nail olunub.
"ABŞ ilə İqtisadi Tərəfdaşlıq Anlaşması və Ukraynanın yenidən qurulması üçün investisiya fondunun yaradılması sahəsində danışıqlar çərçivəsində növbəti müsbət addım atılıb. Texniki komandalarımız bu razılaşma üzərində olduqca dəqiqliklə işləyib və önəmli nəticələr əldə olunub. Hüquq komandamız müqavilə layihəsindəki bir neçə maddəyə düzəliş edib. Hər iki tərəfin danışıqlar aparan nümayəndələrinə təşəkkür edirik. Yaxın zamanda razılaşmanın rəsmiləşdirilməsini başa çatdırmağa hazırlaşırıq. Hazırda komandalar sənədin bəzi detalları üzərində işi davam etdirir. Əsas məsələlərin əksəriyyəti artıq razılaşdırılıb. Bu razılaşma Ukrayna parlamentinin təsdiqindən keçməlidir. Layihə, Ukraynada investisiya və inkişaf imkanları yaradacaq, həm Ukrayna, həm də ABŞ üçün real iqtisadi artım şəraiti formalaşdıracaq", – deyə Svırydenko vurğulayıb.
"Çox yaxın vaxtda müvəqqəti sənəd və ya memorandum imzalana bilər"
Ukraynanın iqtisadiyyat nazirinin müavini Taras Kaçka da danışıqların sürətlə irəlilədiyini təsdiqləyib və yaxın günlərdə müvəqqəti sənədin və ya memorandumun imzalanmasının mümkün olduğunu bildirib. "Bu həftə yekun sənəd imzalanmayacaq. ABŞ tərəfinin təklif etdiyi bəzi ideyaların daha da inkişaf etdirilməsi vacibdir. Bu səbəbdən görüləcək işlər hələ çoxdur", – deyə Kaçka qeyd edib.
Ortaq fondun yaradılması gözlənilir
Xatırladaq ki, sabiq prezident Donald Tramp administrasiyası ABŞ-ın Ukraynaya milyardlarla dollar dəyərində etdiyi hərbi yardımın əvəzində bu ölkədən 500 milyard dollar dəyərində nadir torpaq elementi tələb etmişdi. Lakin bu təklif Ukrayna tərəfindən rədd edilmişdi. Tramp rəhbərliyi ötən ay Ukrayna ərazisindəki təbii sərvətlərin işlənməsi nəticəsində əldə olunan bütün gəlirlərin ortaq investisiya fonduna yönəldilməsini nəzərdə tutan yeni və əhatəli bir mədən razılaşmasını gündəmə gətirib. Ukrayna isə bu müqavilə vasitəsilə ABŞ-ı həm də Rusiyaya qarşı təhlükəsizlik zəmanəti verməyə razı salmağa çalışır.
//Şəfa Yusifzadə, Strateji.az







