Rusiya: "Müzakirə üçün cavab gözləyirik"
Kreml yenidən Ukrayna ilə bağlı danışdı. Strateji.az "haberler.com" saytına istinadən xəbər verir ki, Kremlin sözçüsü Dmitri Peskov Moskvada jurnalistlərin suallarını cavablandırıb.
O bildirib ki, Rusiya Prezidentinin müşaviri Vladimir Medinskiyə və onun ailəsinə təhdidlər olunur. Peskov bu vəziyyəti “dəhşətli” adlandırdı.
O qeyd etdi ki, məsələ ilə Rusiya İstintaq Komitəsi məşğuldur. Əgər bu təhdidlərin arxasında Ukrayna və ya Kiyev rejimi dayanırsa, vəziyyət daha da ağırdır.
Peskov əlavə edib ki, Rusiyanın yeni müzakirə raundu üçün təklifi var. Peskov qeyd edib ki, danışıqların ikinci turunun 2 iyun, bazar ertəsi günü İstanbulda keçirilməsi təklif olunub.
"Ukraynadan cavab gözləyirik. Hələlik heç bir cavab verilməyib," – deyə Peskov vurğulayıb.
O, eyni zamanda Ukraynanın atəşkəslə bağlı sənədə "təcili" reaksiya istəməsini qeyri-konstruktiv saydı.
Xatırladaq ki, bir gün əvvəl Sergey Lavrov da eyni təkliflə çıxış etmişdi.
//Şəfa Yusifzadə, Strateji.az







