Tramp Maskın yeni partiya planlarını “gülünc” adlandırdı

ABŞ Prezidenti Donald Tramp sahibkar Elon Maskın son davranışlarını sərt şəkildə tənqid edib.
Strateji.az xəbər verir ki, Ağ Ev rəhbəri bu barədə jurnalistlərə açıqlamasında deyib.
"Düşünürəm ki, üçüncü partiyanın yaradılması gülüncdür. Respublikaçılar Partiyası ilə çox böyük uğur əldə etmişik. Sistem həmişə iki partiya üzərində qurulub – üçüncü tərəflər heç vaxt işləməyib. O, əylənə bilər, lakin bu, sadəcə xaosa əlavə olacaq", - Tramp deyib.
Daha sonra o, "Truth Social" hesabında paylaşım edib. "Son beş həftə ərzində Elon Maskın tamamilə ağlını itirərək bir fəlakətə çevrildiyini izləmək məni kədərləndirir", - Tramp vurğulayıb.
ABŞ liderinin bu paylaşımı Maskın yeni siyasi partiya yaratmaq planlarına cavab olaraq edilib. Tramp bu ideyanı əsassız hesab edir: "O, üçüncü bir siyasi partiya qurmaq istəyir, baxmayaraq ki, ABŞ-da belə təşəbbüslər heç vaxt uğur qazanmayıb. Görünür, bu ölkənin siyasi sistemi buna imkan vermir", – deyə Tramp qeyd edib.
Prezident əlavə edib ki, belə cəhdlər yalnız qarışıqlıq və xaos yaradır.
Şəfa Yusifzadə







