“COP29 və Azərbaycan üçün Yaşıl Baxış” forumu çərçivəsində gənclərlə dəyirmi masa görüşü keçirilib-FOTOLAR
ADA Universitetində Azərbaycan Respublikası Gənclər Fondunun, ADA Universitetinin və Azərbaycanlı Tələbələr və Məzunlar Platformasının (ASAP) birgə təşkilatçılığı ilə “COP29 və Azərbaycan üçün Yaşıl Baxış” mövzusunda beynəlxalq forum çərçivəsində xarici ekspertlərin gənclərlə görüşü keçirilib. Görüşdə
ADA Universitetinin rektoru Hafiz Paşayev, Azərbaycan Respublikasının Diasporla İş üzrə Dövlət Komitəsinin sədri Fuad Muradov və Azərbaycan Respublikası Gənclər Fondunun icraçı direktoru vəzifəsini icra edən Qədir Xəlilov iştirak edib.
Tədbiri giriş sözü ilə açan ADA Universitetinin prorektoru Fariz İsmayılzadə bildirib ki, Bakıda keçiriləcək COP29 tədbiri sadəcə ekoloji problemlərin müzakirəsi üçün toplaşma olmayacaq. Bu tədbir həm də sözügedən sahədəki məsələlərin həlli üçün birlikdə mühüm addımların atılacağı böyük qlobal forum olacaq.
30 ölkədən 64 ekspertin iştirakı ilə baş tutan interaktiv müzakirədə aktual ekoloji problemlərin həlli yönündə dayanıqlı metodların işlənib hazırlanmasında Azərbaycanın digər ölkələr və qlobal təşkilatlar ilə əməkdaşlıqda malik olduğu böyük imkanlar vurğulanıb. Qeyd edilib ki, COP29 tədbirinin Azərbaycanda keçirilməsi iqlim dəyişikliyinin hədəflənməsində və yaşıl təcrübələrin təşviqinə yönəlmiş qlobal təşəbbüslərin dəstəklənməsində ölkənin fəal rolunun göstəricisidir. Azərbaycanın Birləşmiş Millətlər Təşkilatının İqlim Dəyişikliyi üzrə Çərçivə Konvensiyasının (UNFCCC) və Paris Sazişinin iştirakçısı olması onun iqlim dəyişikliyi ilə mübarizəyə sadiqliyini nümayiş etdirir.
Görüşün davamında gənc iştirakçılar gənclərin iqlim məsələlərinə ümumi münasibəti, bu istiqamətdə təşəbbüsləri, mövcud geopolitik vəziyyətin və yeni nəsil innovasiyaların ətraf mühit ilə bağlı trendlərin inkişaf dinamikasına olan təsiri ilə bağlı fikirlərini beynəlxalq ekspertlərlə bölüşərək, ekspertlərə öz suallarını ünvanlayıblar.
