Nobel Sülh Mükafatını bu qadın aldı

Norveç Nobel Komitəsi 2025-ci il Nobel Sülh Mükafatının qalibini elan edib. 

Strateji.az xarici KİV-ə istinadən xəbər verir ki, Norveç Nobel Komitəsinin açıqlamasına əsasən, bu il mükafat venesuelalı siyasətçi Mariya Korina Maçadoya təqdim olunub.

Komitənin açıqlamasına görə, Maçado mükafata “demokratiya və Venesuela xalqının hüquqları uğrunda yorulmaz mübarizəsinə, eləcə də diktaturadan demokratiyaya ədalətli və dinc keçidə nail olmaq öhdəliyinə görə” layiq görülüb.

Komitə nümayəndəsi onun Venesuelada azad və ədalətli seçkilər uğrunda apardığı mübarizəni yüksək qiymətləndirib və Maçadonun vaxtilə parçalanmış müxalifəti birləşdirərək ölkədə demokratik idarəetmə tələblərini önə çıxardığını vurğulayıb.

58 yaşlı siyasətçi 2011–2014-cü illərdə Venesuela Milli Assambleyasının üzvü olub, 2012-ci il prezident seçkilərində iştirak edib və uzun illərdir Nikolas Maduro hökumətinə qarşı müxalifətdə yer alır.

2024-cü il prezident seçkilərindən sonra Maçado müxalifət namizədi Edmundo Qonzales Urrutiyanın qələbəsinin tanınması tələbi ilə kütləvi etiraz aksiyalarına çağırış edib. Nobel Komitəsi qeyd edib ki, Maçado həyatına və azadlığına yönələn təhdidlərə baxmayaraq, Venesuelanı tərk etməyib, lakin təhlükəsizlik səbəbindən gizlənmək məcburiyyətində qalıb.

Şəfa Yusifzadə