“Səyyahlar” İctimai Birliyi 2023-cü ilin yekunlarını açıqladı
2023-cü il “Səyyahlar Təbii Sərvətlərin və Ətraf Mühitin Araşdırılması və Tanıdılması” İctimai Birliyi üçün genişlənmə və aktivliyin əhəmiyyətli dərəcədə artdığı il olub. Birlik həm maarifləndirmə, həm də praktiki ekoloji fəaliyyət sahəsində bir sıra mühüm təşəbbüsləri həyata keçirib.
Birliyin sədri Elsəvər Cəlilov ilin yekunlarına dair çıxışında bildirib:
“2023-cü il bizim üçün inkişaf ili oldu. Artıq fəaliyyətimizi təkcə maarifləndirmə ilə məhdudlaşdırmır, gəncləri ekoloji təşəbbüslərə cəlb edərək real nəticələr əldə etməyə çalışırıq.”
2023-cü ildə görülən əsas işlər aşağıdakılardır:
· 6 məktəbdə ekoloji təlim və ekoklub fəaliyyətinin təşkili
· “Yaşıl Gənclər Hərəkatı” təşəbbüsünə start verilməsi
· İl ərzində 4 açıq havada ekotur və təbiət müşahidə günü
· 2 regional ekoloji forum və müzakirə paneli
· Sosial mediada ekoloji maarifləndirmə üzrə 15 kontent kampaniyası
Ümumilikdə 2023-cü il ərzində 1500-dən çox şagird, tələbə və gənc təşkilatın fəaliyyətlərinə qoşulub.
Elsəvər Cəlilov qeyd edib ki, 2024-cü ildə təşkilatın hədəfləri sırasında ekoklub şəbəkəsinin genişləndirilməsi, məktəblərarası ekoloji olimpiada, həmçinin beynəlxalq ekoloji təşkilatlarla əməkdaşlığın gücləndirilməsi yer alır.





