DÖVLƏT KOMİTƏSİNİN SƏDRİ ABŞ-NİN ETNİK ANLAŞMA FONDUNUN PREZİDENTİ İLƏ GÖRÜŞÜB
Dini Qurumlarla İş üzrə Dövlət Komitəsinin (DQİDK) sədri Ramin Məmmədov mayın 1-də Bakıda keçirilən VI Ümumdünya Mədəniyyətlərarası Dialoq Forumunda iştirak etmək məqsədilə ölkəmizə səfər edən ABŞ-nin Etnik Anlaşma Fondunun prezidenti və Hampton sinaqoqunun təsisçisi ravvin Mark Şnayer ilə görüşüb.
DQİDK sədri Ramin Məmmədov Prezident İlham Əliyevin dövlət-din münasibətlərinə xüsusi həssaslıqla yanaşdığını vurğulayıb, ölkəmizdə dövlət-din münasibətləri, tolerantlıq sahəsində görülən işlər və həyata keçirilən layihələrdən danışıb. Həmçinin Azərbaycanı beynəlxalq aləmə layiqincə təqdim edən amillər sırasında respublikamızın dünyada sülhün və təhlükəsizliyin möhkəmlənməsinə, milli və ümumbəşəri dəyərlərin, multikulturalizm ənənələrinin qorunub saxlanmasına və inkişaf etdirilməsinə, bu istiqamətindəki problemlərin həllinə dəyərli töhfələr verməsi qeyd olunub.
ABŞ-nin Etnik Anlaşma Fondunun prezidenti və Hampton sinaqoqunun təsisçisi ravvin Mark Şnayer Azərbaycanın dünyadakı tolerant imicinin, mədəniyyətlər, sivilizasiyalar, dinlərarası dialoq prosesində aparıcı mərkəzlərdən olmasından məmnunluq duyaraq, ölkəmizin nümunəvi təcrübəyə malik platforma kimi mühüm rolunu vurğulayıb.
Görüşdə, həmçinin layihələrin həyata keçirilməsi imkanları və əməkdaşlığın perspektivləri barədə fikir mübadiləsi aparılıb.