"Dünya 1 mil hərəkatı" yarışı keçirilib

 Mayın 9-da Gədəbəy rayonunda Ulu Öndər Heydər Əliyevin anadan olmasının 101-ci ildönümünə və Dünya Uşaq Atletikası Gününə həsr olunmuş “Dünya 1 mil hərəkatı” yarışı keçirilib. Gənclər və İdman Nazirliyi və Azərbaycan Atletika Federasiyasının təşkilatçılığı, Dünya Atletikasının dəstəyi ilə 1 mil məsafəyə qaçış yarışında 2010-2011 ci il təvəllüdlü 200-dən artıq iştirakçı mübarizə aparıb. “Yaşıl dünya naminə həmrəylik ili” çərçivəsində təşkil olunan yarışda oğlanlar arasında Rihad Mustafayev ən yüksək göstərici ilə qalib olub. Samid Əliyev 2-ci, Cahid İbrahimov isə 3-cü yeri tutub. Qızların mübarizəsində Fidan Mustafayeva bütün rəqiblərini qabaqlayıb. Aynur Əsgərova və Həbibə Əsgərova isə yarışı müvafiq olaraq 2-ci və 3-cü sıralarda başa vurublar. Qeyd edək ki, Hər il 7 may tarixi dünyada Uşaq Atletikası Günü kimi qeyd edilir. Dünya Atletikasına üzv federasiyalar tərəfindən bu münasibətlə müxtəlif tədbirlər həyata keçirilir. Dünya Atletikasının təklifi ilə bu il  Uşaq Atletikası Günündə uşaqlar bütün dünya üzrə 1 mil məsafəyə qaçışda iştirak edirlər. Beynəlxalq qurumun əsas məqsədi dünya üzrə ümumi 500 min mil məsafənin qət edilməsidir.