“İdeoloji risklər fiziki risklər qədər təhlükəlidir” – Füzuli Qurbanov
Azərbaycan Prezidenti İlham Əliyevin VII Ümumdünya Mədəniyyətlərarası Dialoq Forumunda ideoloji risklərlə bağlı səsləndirdiyi fikirlər cəmiyyətin və dövlətçiliyin qorunması baxımından mühüm əhəmiyyət daşıyır. Müasir dövrdə dezinformasiya, informasiya manipulyasiyaları və kibertəhlükələr insanların düşüncəsinə təsir etməklə cəmiyyətin birliyini və həmrəyliyini zəiflədə bilər.
Strateji.az xəbər verir ki, bunu Fəlsəfə və Sosiologiya İnstitutunun İdrak nəzəriyyəsi və elmin fəlsəfəsi şöbəsinin müdiri, fəlsəfə elmləri doktoru Füzuli Qurbanov deyib.
O bildirib ki, Azərbaycan Prezidentinin forumda səsləndirdiyi fikirlər arasında ideoloji risklərlə fiziki təhlükələr arasındakı əlaqəyə diqqət çəkilməsi xüsusi əhəmiyyət daşıyır:
“Azərbaycan Prezidenti VII Ümumdünya Mədəniyyətlərarası Dialoq Forumunda çox dərin məzmunlu və maraqlı nitq söyləmişdir. Orada çoxlu tezislər irəli sürmüşdür, onlardan biri belədir: "Bizim Azərbaycanda hər hansı daxili risklərimiz yoxdur, bütün potensial risklər hüdudlarımızın kənarından gəlir. İdeoloji risklər isə fiziki risklər qədər təhlükəlidir".
Bu, çox güclü tezisdir. Çünki ilk dəfədir ki, postsovet məkanındakı müstəqil dövlətlərdən biri ideoloji risklərlə fiziki risklər arasında dərin bağlantı qurur. Hər hansı ölkənin vətəndaşını ideoloji baxımdan yolundan azdırmaq, onun şüurunu manipulyasiya etmək, müxtəlif yalan və dezinformasiyalarla aldatmaq son nəticədə bütövlükdə cəmiyyətin məhvinə gətirib çıxara bilər”.
F.Qurbanovun sözlərinə görə, bu baxımdan kibertəhlükəsizlik də xüsusi diqqət tələb edən məsələlərdəndir. Belə təhlükələr təkcə texniki sistemlərə deyil, insanların düşüncəsinə və cəmiyyətdəki münasibətlərə də təsir göstərə bilər.
“Bir qədər əvvəl Azərbaycan Prezidenti bunu da vurğulamışdı ki, kibertəhlükəsizlik həm də fiziki məhvə aparan addımlardan biri ola bilər. Çünki kiberyolla müxtəlif üsullarla insanların şüuruna təsir edib onları çaşdırırlarsa, sonda cəmiyyətdə həmrəylik və birlik zəifləyir. Nəticədə həmin cəmiyyətin fiziki mövcudluğuna belə təhlükə yarana bilər”, – deyə o qeyd edib.
Fəlsəfə elmləri doktoru vurğulayıb ki, ideoloji risklər cəmiyyət üzvlərinə həm fiziki, həm də mənəvi baxımdan mənfi təsir göstərmək potensialına malikdir. Buna görə də dövlətin özünəməxsusluğunun, müstəqilliyinin, dövlətçiliyinin və həyat tərzinin qorunması üçün bu risklərin vaxtında müəyyənləşdirilməsi və neytrallaşdırılması vacibdir.
Ekspertin fikrincə, hər bir vətəndaş ideoloji risklərə qarşı ayıq-sayıq olmalı, xüsusilə gənclərin şüuruna və dünyagörüşünə mənfi təsir göstərə biləcək amillərin qarşısının alınmasına diqqət yetirilməlidir.
“Əlbəttə ki, hər bir vətəndaş, cəmiyyətin hər bir üzvü bu tezis üzərində düşünməlidir. İdeoloji risklərə qarşı hər kəsin hazırlıqlı və ayıq-sayıq olması çox vacibdir. Xüsusilə gənclərimizə ola biləcək mümkün neqativ təsirləri neytrallaşdırmalı, zərərsizləşdirməliyik”, – deyə F.Qurbanov əlavə edib.



