Peşəkar Psixoloqlar İctimai Birliyi səhiyyə profilli QHT-lərin görüşündə təmsil olunub
2024-cü il avqustun 24-də Qeyri-Hökumət Təşkilatlarına Dövlət Dəstəyi Agentliyinin təşkilatçılığı ilə səhiyyə profili üzrə fəaliyyət göstərən bir sıra QHT rəhbərlərinin iştirakı ilə görüş keçirilib.
Görüşdə Peşəkar Psixoloqlar İctimai Birliyinin sədri, psixoloq Səbinə İsmayılova da iştirak edib.
Tədbirdə Prezident Administrasiyasının, QHT-lərə Dövlət Dəstəyi Agentliyinin, Səhiyyə Nazirliyinin, TƏBİB-in, Azərbaycan Həmkarlar İttifaqları Konfederasiyasının və Azərbaycan Milli QHT Forumunun nümayəndələri iştirak ediblər.Görüş zamanı səhiyyə sahəsində fəaliyyət göstərən QHT-lərin qarşısında duran vəzifələr, dövlətin səhiyyə siyasətinin prioritetlərinə uyğun olaraq ictimai təşkilatların fəaliyyətinin gücləndirilməsi, xəstəliklərin müalicəsinə dair tibbi protokolların təkmilləşdirilməsində QHT-lərin töhfələrinin artırılması imkanları müzakirə olunub.Eyni zamanda, ixtisaslaşmış QHT-lərin əməkdaşlığının genişləndirilməsi, səhiyyə profilli təşkilatların fəaliyyətini əlaqələndirəcək forumun keçirilməsi və peşə birliklərinin rolunun artırılması ilə bağlı təkliflər səsləndirilib.Görüşdə iştirak edən QHT nümayəndələri Azərbaycan Milli QHT Forumunun təşəbbüsü ilə yaradılmış COP29 QHT Koalisiyasının fəaliyyətində iştirakları barədə də məlumat veriblər.
Peşəkar Psixoloqlar İctimai Birliyi üçün bu görüş səhiyyə və psixoloji xidmətlər sahəsində fəaliyyət göstərən təşkilatlarla əməkdaşlığın genişləndirilməsi, təcrübə mübadiləsi və psixoloji xidmətlərin inkişafı istiqamətində aktual məsələlərin müzakirəsi baxımından əhəmiyyətli olub.







