Bakıda DƏHŞƏT: Qızla dalaşan oğlan qazini öldürdü - ANBAAN VİDEO

 2022-ci il avqustun 15-də Bakının Yasamal rayonu 3-cü Alatava massivi, Salamzadə küçəsində, "Betonpark" adlanan yerüstü piyada keçidin yaxınlığında qətl hadisəsi baş verir. Məlumatla əlaqədar dərhal polis və prokurorluq əməkdaşları məhkəmə-tibbi ekspertinin iştirakı ilə hadisə yerinə və qətlə yetirilən 1998-ci il təvəllüdlü Niyaməddin Muradovun meyitinə baxış keçirirlər.

Həmin gecə Bəxtiyar Qarayev Nəsimi rayon Polis İdarəsinin 20-ci Polis Bölməsinə gələrək, könüllü təslim olub və cinayəti, təqdim etdiyi qatlanan bıçaqla törətdiyini bildirib. Baxış zamanı, alətin üzərində qan izləri aşkar edilib. Anket məlumatlarına əsasən, Bəxtiyar Qarayev 1999-cu ildə Ağdaş rayonunda anadan olub, əvvəllər məhkum olunmayıb.

Faktla bağlı Nəsimi rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.

Məlum olub ki, Niyaməddin Muradov 44 günlük Vətən müharibəsinin iştirakçısı olub. Müharibədə yaralanan N.Muradov "Qubadlının azad olunmasına" görə medalı ilə təltif edilib.

Strateji.az Lent.az-a sitinadən qətl hadisəsinin istintaq materiallarını təqdim edir.

 İstintaqla müəyyən edilib ki, Bəxtiyar Qarayev avqustun 14-ü saat 22 radələrində qeyri-rəsmi münasibətdə olduğu Səriyyə Hüseynova ilə aralarında olan mübahisəni həll etmək məqsədilə 3-cü Alatava massivi, Salamzadə küçəsində yerləşən "Beton park" adlanan ərazidə görüşüb. Qadını xəyanət etməkdə günahlandıraraq, ona məxsus, dəyəri 250 manat olan mobil telefonunu sındırıb. Sonra Bəxtiyar Qarayev Səriyyə Hüseynovanın üzünə sillə vurub və silah qismində istifadə etdiyi telefonla başına zərbələr endirib. İctimai qaydanı kobud sürətdə pozan şəxsə yaxınlaşan Niyaməddin Muradov, Vüsal Əhmədov və Nəcməddin Kurtayev qadından əl çəkməsini və səs-küy salmamasını bildirərək, yollarını davam ediblər.

Bundan hiddətlənən Bəxtiyar Qarayev arxalarınca qaçaraq onlara çatıb və dava zamanı, qisas məqsədi ilə Niyaməddin Muradova bıçaqla zərbələr vuraraq, onu  öldürüb.

İş üzrə dindirilmiş Bəxtiyar Qarayev bildirib ki, bir müddət Səriyyə Hüseynova ilə ər-arvad kimi yaşayıb. Ayrılmalarına baxmayaraq, arada qadının yanına gedib-gəlib:

"Hadisə baş verən gün işdən sonra Səriyyə ilə görüşəndə, onun telefonuna mesaj gəldiyini görüb əsəbləşdim və əlindən telefonunu alıb sındırdım. Səriyyə ilə mübahisə edərkən, tanımadığım şəxslər küçədə səs-küy salmamağımla bağlı irad bildirdilər. Sonra aramızda başlanan dava zamanı, həmin oğlanlar tərəfindən döyüldüm. Bıçaqdan onları qorxutmaq üçün istifadə etdim, bunlar müşahidə kamerasına da düşüb. Niyaməddinin yerə yıxıldığını görüb hadisə yerindən qaçdım. Sonra marketdən özümə su aldım və taksi ilə polis bölməsinə gedərək, təslim oldum. Üzərimdəki açılıb-qatlanan bıçağı polislərə təqdim etdim".

Zərərçəkmiş şəxsin hüquqi varisi Dərşad Muradov ifadəsində göstərib ki, hadisə baş verən gün Salyan rayonunda olub:

"O biri oğlum zəng edib, Niyaməddinin bıçaqlandığını xəbər verəndən sonra gecə ilə Bakıya qayıtdım. Xəstəxanaya çatanda oğlumun öldüyünü öyrəndim. Niyaməddin Vətən Müharibəsi iştirakçısı idi. Cinayəti törədən şəxsin valideynləri və ya qohumları barışıq üçün yanıma gəlməyiblər".

Zərərçəkmiş Səriyyə Hüseynova ifadəsində göstərib ki, Bəxtiyar Qarayevlə 3 il birlikdə yaşayıb, ayrılmalarına baxmayaraq arada yenə görüşüblər:

"Avqustun 14-də onunla görüşəndə, İlqar adlı tanışımdan telefonuma ismarıc gəldi. Bunu görən Bəxtiyar telefonu əlimdən alıb sındırdı və mənə əl qaldırdı. Yaxınlaşan 3 nəfər Bəxtiyardan nəyə görə qadına qarşı belə hərəkət etdiyini soruşanda o, həmin oğlanlara ailə məsələsi olduğunu dedi. Sonra Qarayev yolu keçərək, onlarla mübahisə etməyə başladı və Niyaməddin Muradovu bıçaqladı".

Zərərçəkmiş Vüsal Əhmədov bildirib ki, ailəsini dolandırmaq üçün tez-tez Bakıya gələrək, fərdi qaydada fəhlə kimi çalışıb:

"Niyaməddin Muradovu İkinci Vətən müharibəsində iştirak edən vaxtdan tanıyırdım. Bakıya işləməyə gələndə Niyaməddinlə əlaqə saxlayaraq, bəzən onun Salamzadə küçəsi, 11 ünvanında, kirayədə yaşadığı evdə qalırdım. Həmin ünvanda həmçinin Niyaməddinin atası və Nəcməddin adlı oğlan da yaşayırdı. Avqustun 14-də Niyaməddinlə gəzəndə parkdan səs-küy eşitdik. Keçidin yanında Səriyyə ilə Bəxtiyarın mübahisə etdiklərini gördük. Niyaməddin Bəxtiyardan nə məsələ olduğunu soruşanda, oğlan Səriyyənin yaşadığı qadın olduğunu və söhbətinə qarışmamasını dedi. Səriyyə ağlaya-ağlaya bizə Bəxtiyardan onun telefonunu alıb, qaytarmağımızı söylədi. Buna görə, Niyaməddin Bəxtiyarın arxasınca qaçdı və ona təpik atdı. Bəxtiyar əlində bıçaq əvvəl Niyaməddinin, sonra da mənim üzərimə gəldi. Yerdən daş götürərkən Bəxtiyarın məhlənin içərisinə doğru, Niyaməddinin isə üstünü təmizləyərək, yola tərəf qaçdığını gördüm. Sonra dostum yerə yıxıldı. Sol əlinin qana bulaşdığını görəndə onun yaralandığı anladım. Ətrafımıza xeyli insan toplaşmışdı. Yoldan keçən taksini saxlayaraq Nəcməddin və Səriyyə ilə birlikdə Niyaməddini maşına mindirib Kliniki Tibbi Mərkəzə apardıq. 5-10 dəqiqədən sonra həkim bizə Niyaməddinin öldüyünü dedi. Xəstəxanaya gələn polis əməkdaşları Səriyyədən Bəxtiyarın yaşadığı ünvanın yerini öyrəndilər. Bir müddətdən sonra, öyrəndim ki, Niyaməddini öldürən şəxs könüllü təslim olub".

Şahid Nəcməddin Kurtayev bildirib ki, avqustun 14-də baş vermiş davanı uzaqdan izləyib:

"Tanışım Niyaməddin Muradovla dalaşan Bəxtiyar Qarayevin əlində bıçaq görmədim. Onlar bir-birinə yumuqla və təpiklə zərbələr vururdular. Bəxtiyar hadisə yerindən qaçandan sonra Niyaməddin geri qayıtdı və yolun kənarında yıxıldı. Yaxınlaşıb, nə baş verdiyini soruşanda, o, bıçaqlandığını dedi".

 Məhkəmə iclasında Bəxtiyar Qarayev ittihamlar üzrə özünü təqsirli bilib. Zərərçəkmişi öldürmək niyyətinin olmadığını və onun kim olduğunu istintaq zamanı bildiyini qeyd edib.

Zərərçəkmiş şəxsin hüququ varisi təqsirləndirilən şəxsə ən ağır cəza verilməsini xahiş edib. Zərərçəkmiş Səriyyə Hüseynova Bəxtiyar Qarayevə şikayəti olmadığını və ona qanuna müvafiq cəza verilməsini xahiş edib.

 Məhkəmə qənaətə gəlib ki, Bəxtiyar Qarayevin Cinayət Məcəlləsinin 120.2.2-ci (xuliqanlıq niyyəti ilə qəsdən adam öldürmə), 120.2.3-cü (zərərçəkmiş şəxsi, ictimai borcunu yerinə yetirməsi ilə əlaqədar qəsdən öldürmə), 221.3-cü (xuliqanlıq, silahdan və ya silah qismində istifadə edilən əşyalarla törədildikdə) və 228.4-cü (qanunsuz olaraq soyuq silah əldə etmə, satma və ya gəzdirmə) maddələri ilə nəzərdə tutulmuş cinayət əməllərini törətməsi tam sübuta yetirilib.

Onun cinayət məsuliyyətindən və cəzadan azad olunması üçün əsaslar yoxdur. 

Bakı Ağır Cinayətlər Məhkəməsinin hökmü ilə Bəxtiyar Qarayev cəzasını ciddi rejimli cəzaçəkmə müəssisəsində çəkməklə 18 il müddətinə azadlıqdan məhrum olunub.