Qubadlı şəhərinin azad edilməsi qələbəmizi yaxınlaşdırdı
Qubadlı rayonu, 1993-cü ilin avqust ayında Cəbrayıl və Füzuli rayonlarının işğal edilməsindən cəmi səkkiz gün sonra, 31 avqust tarixində Ermənistan silahlı qüvvələri tərəfindən işğal olunmuşdur. Ard-arda üç rayonumuzun qısa bir zaman kəsiyində işğala məruz qalması, Azərbaycan xalqı üçün böyük bir itki və kədər simvoluna çevrilmişdir. Ümumilikdə hər bir qarış torpağımızın işğalı bizim üçün fəlakət və hüzün mənbəyidir, Qubadlı da bu mənada istisna deyil.
Vətən müharibəsi zamanı Qubadlının azad edilməsi, yalnız qubadlılıları deyil, bütün xalqımızı sevincə qərq etdi. 27 illik əsarətini sonlandıran Vətən torpağının qüruru, hər birimizi fərəhə boğdu. Qubadlı, yalnız strateji mövqeyi ilə deyil, həm də zəngin tarixi, mədəni irsi və gözəl təbiəti ilə tanınır. Müharibənin gedişi zamanı Qubadlının azad edilməsi, strateji cəhətdən də əhəmiyyətli oldu. Füzuli, Cəbrayıl və Zəngilandan sonra, bu azadlıq, qətiyyətimizi və qələbə əzmimizi bir daha açıq şəkildə ortaya qoydu. Eyni zamanda, Ermənistanla keçmiş “Dağlıq Qarabağ” bölgəsi arasındakı əlaqənin itməsinə və Qubadlıdan Laçın rayonuna və dəhlizinə birbaşa çıxış əldə olunurdu.
Ölkə başçımız Qubadlı rayonunun işğaldan azad olunması ilə bağlı demişdir: 25 oktyabr müharibənin gedişatında önəmli yer tutub. Çünki Qubadlı azad olunandan sonra Laçın istiqamətində yolumuz açıldı və bir neçə gündən sonra biz Laçının cənub hissəsində yerləşən kəndləri də azad etdik. Beləliklə, Laçın dəhlizini nəzarətə götürdük və artıq müharibənin taleyi həll edilmişdi. ..... Biz Qubadlıdan sonra öz Zəfər yürüşümüzü, Zəfər missiyamızı şərəflə davam etdirdik və noyabrın 8-də Şuşada dövlət bayrağını ucaltdıq.
Azərbaycan Respublikasının Prezidenti İlham Əliyev Qubadlının azadlığının birinci ildönümündə dediyi bu sözlərə əlavə olaraq, onu da vurğulamışdır ki, biz Qubadlı rayonunun bütün kəndlərini, o cümlədən Qubadlı şəhərini yenidən quracağıq. Bəli, bu gün bu istiqamətdə əməli işlər görülür. Dövlət və özəl sektor tərəfindən həyata keçirilən layihələr, infrastrukturun bərpasını və inkişafını hədəfləyir. Yeni yaşayış kompleksləri, məktəblər və səhiyyə ocaqları inşa edilərək, əhalinin geri dönməsinə və həyat şəraitinin yaxşılaşmasına imkan yaradılır.
Qeyd edək ki, Qubadlı, turizm baxımından da böyük potensiala malikdir. Tarixi abidələr, gözəl təbiət mənzərələri və yerli mədəniyyət, bu bölgəni turistlər üçün cəlbedici edir. Dövlət tərəfindən turizm infrastrukturuna diqqət ayrılması və turizmin inkişaf etdirilməsi perspektivdə bölgənin iqtisadiyyatını canlandıracaq və yerli əhalinin iş imkanlarını artıracaqdır.
Sonda vurğulamaq istərdim ki, Qubadlının işğaldan azad edilməsi Azərbaycanın ərazi bütövlüyü və müstəqilliyi uğrunda aparılan mübarizənin növbəti qələbə səhifəsi idi. Bu, regionun sosial-iqtisadi inkişafının sürətlənməsinə, yerli əhalinin geri dönməsinə və yeni imkanların yaranmasına şərait yaratdı. Şübhə yoxdur ki, Qubadlı, Azərbaycanın müstəqillik simvolu olaraq, gələcək nəsillər üçün əhəmiyyətli bir mərkəzə çevriləcəkdir.
Aysel Qəribli
Pirallahı rayon MKTB-nin əməkdaşı, YAP Pirallahı rayon təşkilatının üzvü