Azərbaycan Premyer Liqasının XX turunun qapanış oyunu olan "Qarabağ" - "Turan Tovuz" qarşıdurmasın gərginliyi və maraqlılığı ilə diqqət çəkdi. "Qarabağ" erkən qol vurub, oyunun böyük hissəsində dominantlıq etməsinə rəğmən tovuzlular xarakter nümayiş etdirərək təslim olmadılar və oyunun son dəqiqələrində geridönüş edərək iki qol vurub qələbə qazandılar. "Süvarilər"in yeganə qolunun müəllifi
Musa Qurbanlı məğlub olduqları matçla bağlı Strateji.az saytına müsahibə verib
- Yenə "Turan Tovuz"la dueldə uğursuzluğa məruz qaldız. Son dəqiqələrdə qollar buraxaraq məğlub olmağınıza səbəb nə oldu?
- Oyunun çətin keçəcəyini bilirdik. Tovuz təmsilçisi özünə məxsus futbol sərgiləməklə bütün komandalara qarşı başağrısı olmağı bacarır. Bu mövsüm onlar bizim üçün də keçilməz rəqibdir. Əvvəlki iki oyunda da tovuzluları məğlub edə bilməmişdik. Ümumi götürəndə matça yaxşı başladıq, erkən qolla sevindik, sonrakı dəqiqələrdə də kreativ futbol sərgilədik. Sadəcə son dəqiqələrdə şansızlıq və standart vəziyyətlərdən qol yeməyimiz gözlənilməz oldu. Məğlubiyyətə layiq deyildik, amma son anda buraxdığımız boşluqlardan "Turan Tovuz" maksimum istifadə etdi.
- Son iki oyunda standart vəziyyətlərdən qollar buraxırsız. Elə avrokubokda FCSB ilə matçda da rəqib 3 dəfə standart vəziyyətdən sizi məyus etdi. Komanda standart vəziyyətlər qarşısında niyə acizlik sərgiləyir?
- Əslində məşqlərdə bu çatışmazlığı aradan qaıdırmaq üçün üzərimizdə maksimum çalışırıq. Məşqçilərimiz bununla bağlı təlimatlarını, tənqidlərini çatdırırlar. Amma oyunlara gələndə yenə standart vəziyyətlərdən qollar buraxırıq. Bunu bilmirəm şansızlıq, konsetrasiyanın itirilməsi və ya daha necə adlandırım. Görünən odur ki, bu nöqsanımızı hələ aradan qaldıra bilməmişik və üzərimizdə çox çalışmalıyıq.
- Arıdıcıl oyunlarda hesabda öndə olarkən rəqiblər geridönüş edərək sizə məğlubiyyət yaşadır. Bu hal futbolçularda psixoloji gərginlik yaratmayacaq?
- Əlbəttə ki, son oyunlardakı nəticələr bizə pis təsir edir. Amma biz bundan tənəzzülə yuvarlanmamalı, əksinə dərs çıxarıb tərəqqiyə doğru addımlamalıyıq. "Qarabağ" ilk dəfə deyil çətin anlar yaşayır, amma hər dəfə yıxılarkən qalxmağı bacarmış və qarşımıza qoyulan məqsədlərə nail olmuşuq. Bu dəfə də toparlanıb daha əzmlə irəli gedəcəyimizə inanıram.
- Olavio Juninyonun gedişi artıq komandada öz təsiri göstərir. Onun yoxluğunu necə kompensasiya etməyi düşünürsüz?
- Təbii ki, Juninyo çox keyfiyyətli futbolçu idi, onun necə forvard olması hamıya məlum idi. Amma futbolun reallıqlarından biri də odur ki, bu gün burdasan, sabah başqa yerdə. Odur ki, Juninyonun gedişini faciəyə çevirməməliyik. Kollektiv olaraq hücumdakı boşluğu doldurmaq üçün əlimizdən gələnin ən yaxşısını edəcəyik.
- Sən, hücumçusan və Juninyonun gedişindən sonra sənə də ümidlər çoxdur. "Qarabağ"ın əsas vuran ayağı olmağı hədəfləyirsənmi?
- Əlimdən gələn hər şeyi edirəm və bundan sonrada bütün qüvvəmi ortaya qoyacam ki, komandama faydalı olum.
//Strateji.az ABDULLA İSMAYILOĞLU