Geriyə qayıt Çap et

Araz Abdullayev: "Bu uğurumuzu qarşıdakı turlarda da davam etdirmək istəyirik"

 "Qaradağ Lökbatan" çempionatın ikinci yarısına qələbəylə başladı. Qəsəbə təmsilçisi doğma divarlar arasında "Cəbrayıl"ı üstələdi. Komandanın ən təcrübəli oyunçusu, yığmamızın sabiq üzvü Araz Abdullayev qələbəylə bağlı Strateji.az saytına  danışıb. 

-Komandan çempionatın II pərdəsinə üç xal ilə başladı. Qələbəylə bağlı fikirlərin maraqlıdır...

-Bildiyiniz kimi qış fasiləsində komandamızda dəyişikliklər oldu. Gedənlər və yeni gələnlər oldu. Sıralarımıza qoşulan oyunçular arasında təcrübəli, səviyyəli futbolçular var. Qış toplanışında çalışdıq ki, çempionatın ikinci yarısına maksimum yaxşı hazırlaşaq. Odur ki, fasilədən sonrakı ilk oyunumuzda qələbə üçün meydana çıxmışdıq. Şükürlər olsun ki, istəyimizə nail olduq. Bu uğurumuzu qarşıdakı turlarda da davam etdirmək istəyirik. 

-"Qaradağ Lökbatan"da artıq səninlə yanaşı daha bir təcrübəli Nurlan Novruzov və elitada oynamış Bahadur Həziyev var. Bu futbolçuların gəlişi komanda üçün yeni qan olacaqmı?

-Həmin futbolçular kifayət qədər təcrübəlidirlər. Hesab edirəm ki, gücümüzü birləşdirsək və yeni qoşulan bütün oyunçuların bacarığından, təcrübəsindən maksimum yararlanaraq istədiyimiz nəticələrə nail olacağıq. 

-Zədəyə görə komandanın çempionatın ikinci raundundakı matçında kənarda qaldın. Bərpa prosessin çoxmu çəkəcək?

-Hazırda zədəmi müəalicə edirəm. Demək olar sağalmışam. Qarşıdakı turlarda komandama kömək etməyə çalışacam. 

-Yetirməsi olduğun "Neftçi" heç də yaxşı günlərini yaşamır. Həm sabiq komandan, həm də "Qaradağ Lökbatan" aşağı liqaya düşməmək üçün çarpışır. Bu oxşarlıq barədə nə deyərdin?

-İstər sovet dönəmində, istərsə də 90-cı illərdə Azərbaycan futbolu deyəndə ilk ağıla gələn "Neftçi" olub. Bu komanda həmişə yaxşı nəticələriylə tarix yazmağı bacarıb. "Ağ-qaralar"ın uğur qazandığı matçların hamısında stadionlar  ağzına kimi dolu olub. Bu elə bir komandaydı ki, hamı onu sevirdi. Təbii ki, "Neftçi"nin hazırkı vəziyyəti hamımızı kədərləndirir. 

-Səncə, "Neftçi" qara zolaqdan çıxa biləcəkmi?

-“Yuxarıda dediyim kimi "Neftçi" Azərbaycanın köklü klubudur. İnanıram ki, onlar tədricən toparlanacaq və layiq olmadığı yerlərdən qurtulacaq. "Ağ-qaralar"a ürəyimizdə sevgi sonsuzdur. Odur ki, zamanla ənənəvi “flaqman”ı yenidən görəcəyik.

-Premyer Liqamızın səviyyəsi haqqında nə deyərdin?

-Elitamızda səviyyə bir qədər yüksəlib. Çempionatda iddialı komandaların sayında da artım var. Hesab edirəm ki, həm məşqçilər, həm futbolçular, həm də sponsorlar bir qədər də Premyer Liqanın səviyyəsini qaldıra bilərlər.

// Strateji.az ABDULLA İSMAYILOĞLU