Geriyə qayıt Çap et

Paşa Əliyev: "Bilmək olmur AFFA niyə belə qərarlar verir?"

  AFFA-ın gələn mövsüm üçün elitada legioner limitinin ləğviylə bağlı qərarı futbol ictimaiyyətində etirazla qarşılanıb. Federasiyanın bu qərarına müxalif olanlardan biri də ölkə çempionatının sabiq bombardiri, "Xəzri", "Neftçi" kimi klublarda oynamış və Azərbaycan yığmasının formasını geyinən Paşa Əliyevdir. Veteran futbolçunun mövcud qərarla bağlı Strateji.az saytına mövqeyini açıqlayıb. 

"Tək elitada yox, bütün çempionatlarımızda komanda sayının artılması alqışlan addımdır. Amma həmişəki kimi bir yaxşı qərar verdiyimiz kimi, pis qərar da verdildi. Legioner limitinin ləğvi futbolumuz üçün heç də yaxşı addım olmadı. Onsuz da çempionatımızda yerli oyunçularımız azdır, istedadlı gənclərimiz daha da azdır. Bu gün U-21 seçməmizə və əsas millimizə çağırmağa futbolçu tapılmır. Uşaq futbolumuz arzulanan səviyyədə deyil, futbol akademiyalarımız dünya standartlarından geri qalır. Aşağıdan yetişib gələn tək-tük futbolçu harda oynayıb özünü göstərsin?! II Liqamız yarımpeşəkardır, I Liqanın səviyyəsi aşağıdır. Bir qədər güclülər dəstəsi yavaş-yavaş inkişaf edir, hansı ki, burda 17, 18, 19 yaşlı oyunçular şans qazanaraq təcrübə toplaya bilər. Legioner limitinin ləğvi onların da yolunu bağlayacaq. Bu qərar həmçinin Premyer Liqada da disbalans yaradacaq. Pul sarıdan korluq çəkməyən komandalar səviyyəli legionerlər transfer edəcək, büdcə kasadlar isə zəif oyunçularla kifayətlənəcək. Belə halda yenə də çempionluğa yalnız bir iddialı komandanı görəcəyik. Halbuki, bu günü federasiyada əyləşənlərin verdiyi qərarlarla həm ölkə futbolu hərtərəfli çiçəklənməli, həm də Premyer Liqada güclü rəqabət mühiti formalaşdırılmalıydı. Amma görünən odur ki, yenə də futbolumuzda natamamlıqlar olacaq. Bilmək olmur AFFA niyə belə qərarlar verir?! Bir tərəfdən sevinir, digər tərəfdən məyus olursan. Düşünürəm ki, legioner limitinin ləğvi bu gün üçün düzgün qərar deyil".-deyə veteran futbolçu bildirib

// Strateji.az ABDULLA İSMAYILOĞLU