Qış fasiləsindən sonra I Liqanın uğurlu çıxış edən komandalardan biri də "Zaqatala"dır. Bölgə təmsilçisi çempionatın ikinci yarısında hələlik məğlub olmayan iki komandadan biridir. Zaqatalalılar son oyunda doğma divarlar arasında "Difai Ağsu" ilə heç-heçə edib. "Zaqatala"nın baş məşqçisi Rüstəm Məmmədov Strateji.az saytına açıqlama verib .
"Qış fasiləsindən sonra çempionatda üç oyun keçirmişik və məğlub olmamışıq. Buna bir tərəfdən baxanda sevinirik, digər tərəfdən isə kədərlənirik. Çünki artıq necənci oyundu qalib gəlməli olduğumuz matçda vacib xal itiririk. Kənarda bu o qədər diqqətə alınmasa da, komandanın daxilindən olan biri üçün çox çətindir. Hesabı açırıq, oyunun böyük hissəsində qalib bizik, amma son dəqiqələrdə ani bir səhv, diqqətsizlikdən qol buraxıb, qələbəni əldən veririk. Təbii ki, “Difai Ağsu” da kifayət qədər təhlükəli rəqibdir. Onlar məğlubiyyətdən qaçmaq üçün sona qədər mübarizə apardılar. Digər ən böyük problemimiz futbolçularımızın sıradan çıxmasıdır. XII turda kapitanımız Kənan Müslümovu itirdik. O, 3 ay futboldan kənarda qalacaq. Bundan başqa qapıçımız İvan Markov məşq zamanı zədələnərək sıralarımızdan uzaq düşüb. Cavad Qurbanlı da travmadan əziyyət çəkir. Son oyunda isə Aqşin Abazərovu itirdik. O, oyuna zədəsini tam sağaltmadan çıxdı və matç boyu zədələndi. Heyətimiz kasad olduğu üçün rotasiyalar edə bilmirik. Futbolçuların zədələnməsinin birinci ən böyük səbəbi meydança amilidir. Bizim hazırda ev oyunlarmızı keçirdiyimiz Zaqatala Olimpiya İdman Kompleksinin futbol məkanının süni qazonu artıq istismar müddətini başa vurub. Yuxarıda qeyd etdiyim ki, tək oyunlarda yox, elə məşq prosessində də oyunçularımız zədələnir. Digər səbəb isə heyətimizin kasad olmasıdır. Məhz buna məcbur olub eyni futbolçuları bütün matçlarda şans veririk. Mövqelər üzrə alternativ futbolçularımız yoxdur. Həmçinin futbolçuların qidalanması, istirahəti, bərpa prosessi keçməsi və digər bu kimi məsələlər də futbolçuların zədələnməməsində rol oynayır. Bizim büdcə problemimiz olduğundan futbolçuları maksimum qorumağa çalışırıq, amma etiraf etməliyik ki, elita təmsilçiləri qədər bu işdə tam peşakar ola bilmirik. Çünki zəruri maddi imkanlarımız yoxdur. Qarşıda bizi “İmişli” ilə ağır səfər matçı gözləyir, bizim isə aparıcı oyunçularımız sıradan çıxıb. Buna rəğmən maksimum çalışacağıq ki, əzmkar mübarizə aparıb xalla dönək"-Rüstəm Məmmədov deyə bildirib.
// Strateji.az ABDULLA İSMAYILOĞLU