Geriyə qayıt Çap et

Yusif Nəbiyev: "Bütün komanda yoldaşlarıma da bunu aşılayıram"

 Azərbaycan Premyer Liqasının XXIII turunun qapanış görüşü olan "Səbail" - "Sabah" oyunu qolsuz bərabərliklə tamamlanıb. "Dənizçilər"in kapitanı Yusif Nəbiyev matçla bağlı Strateji.az saytına danışıb. 

- Bir xal qazandığınız oyunla bağlı fikirlərin maraqlıdır...

- Bizim üçün ağır qarşılaşma olacağını bilirdik. Buna rəğmən meydana qələbə üçün çıxmışdıq. Çox çalışdıq, amma 3 xal qazana bilmədik. İstənilən halda bir xal da bizim üçün qızıla bərabərdir. Əsas odur ki, 90 dəqiqəni xalsız başa vurmadıq. 

- Çempionatın ikinci raunduna pis başlamadız, ardıcıl qələbələr gəldi. Amma son iki oyun sizim üçün uğurlu keçmir. Ötən turda "Qarabağ"a böyük hesabla məğlub olduz, bu gün isə heç-heçə etdiz. Bu nəticələr komandada psixoloji tənəzzülə səbəb olmayacaq? 

- Səmimi deyək ki, "Qarabağ" çempionatda bütün rəqiblərindən iki baş üstündür. Buma rəğmən onlarla oyuna da yaxşı motivasiya ilə çıxmışdıq, sadəcə təcrübəsizlik, ustalıq səviyyəsi matçın taleyini həll etdi. "Sabah"la qarşılaşmada da istəkliydik. Sadəcə qol imkanlarında son nöqtəni qoya bilmədik. Biz hər oyuna qələbə üçün çıxırıq. Odur ki, komandada əhval-ruhiyyə qaydasındadır. 

-  Qış fasiləsində "Səbail"ə qoşulan oyunçular kollektivin "ansambıl"ına  tam adaptasiya oluna biliblərmi? 

- Heyətimizə qışda qoşulanlar keyfiyyətli futbolçulardır. Sadəcə onların daha yaxşı formaya düşməsi üçün daha bir-iki oyun lazımdır. Düşünürəm ki, qarşıdakı matçlarda yenilərimiz meydanda daha yaradıcı olacaqlar. 

- Bir kapitan kimi "Səbail"i elitada qoruya biləcəyinizə inanırsanmı? 

- Bir futbolçu kimi deyim ki, formasını geyindiyim klubun elitanı tərk etməsini özümə sığışdırmaram. Bütün komanda yoldaşlarıma da bunu aşılayıram. "Səbail" özünə görə adı var və klubun Premyer Liqada qalması üçün bütün gücümüzü, bacarığımızı ortaya qoyacağıq. Hər turdakı qarşılaşmaya final görüşü kimi baxırıq. Ümid edirəm ki, tökdüyümüz tər, əziyyətin bəhrəsi hədər olmaz. 

// Strateji.az ABDULLA İSMAYILOĞLU