Azərbaycan Kubokunun ¼ finla mərhələsinin cavab oyunları çərçivəsində "Neftçi" doğma divarlar arasında “Kəpəz”i məğlub edib. Bununlada Bakı təmsilçisi yarımfinala yüksəldi. Matçla və qarşıdakı hədəflərlə bağlı “ağ-qaralar”ın futbolçusu Ağadadaş Salyanski Strateji.az saytına müsahibə verib.
-"Kəpəz"i məğlub etməklə kubokda yarımfinala çıxdız. Matçla bağlı fikirlərin maraqlıdır...
-Oyunun startından əvvəl hava şəraiti dəyişdi və qar yağmağa başladı. Bu o demək idi ki, işimiz daha da çətin olacaq. Kəskin soyuqlu havada da mübarizə aparmaq ağırdır, çox yüklənirsən, enerji sərf edirsən. Hər iki tərəf meydanda məğlub olmamaq üçün yaxşı döyüşdü, həm qol vurduq, həm də azlıqda qaldıq. İstənilən halda sonda qələbə qazandığımıza sevinirəm.
-Bu aralar qol "oruc"undasan. Səbəb nədir?
-Bir forvard olaraq işim qol vurmaqdır. Amma yalnız qol vurmaqla iş bitmir. Əsas olan vurduğum qolların “Neftçi”yə uğur qazandırmasıdır. Hazırda qol vurmasam da, komanda qələbələr qazanır. Odur ki, qol sayımı artırmaqdan çox, “ağ-qaralar” qələbə və xal sayının artmasında maraqlıyam.
-Premyer Liqanın turnir cədvəlində vəziyyətiniz arzuolunan olmasa da, kubokda yaxşı irəliləyirsiz. Səncə, kuboka daha çoxmu fokuslanmısız?
-Turnir cədvəlində bir qədər geridəyik. Buna rəğmən heç də bütün fikirimizi kuboka yönəltməmişik. Sadəcə avrokuboklara ən qısa yol kubokdan keçir deyə, bu turnirdən maksimum faydalanmağa çalışırıq.
-Hazırkı performansın haqqında nə deyərdin?
-Performansım barədə mənim danışmağım düzgün deyil. Bu barədə məşqçilər korpusumuz fikir bildirsə yaxşı olar. Qısaca onu vurğulayım ki, üzərimdə çox işləyirəm və inkişaf hiss edirəm.
-Martın 25-də yığmanın yoldaşlıq görüşü olacaq. Dəvət gözləyirsənmi?
-Əslində tək A millimizin yox, U-21 seçməmizin də oyunu var, yaşım hələ orda da oynamağa imkan verir. Düşünürəm ki, iki seçməmizdən birinə dəvət alacam və oyunlarda şans verilsə əlimdən gələnin ən yaxşısını etməyə çalışacam.
// Strateji.az ABDULLA İSMAYILOĞLU