Azərbaycan Premyer Liqasının XXV turunun açılışı "Səbail" - "Şamaxı" görüşü ilə start götürüb. Qarşılaşma bölgə təmsilçisin qəbələbəsiylə başa çatıb. Oyundan sonra "dənizçilər"in futbolçusu Fərid Nəbiyev Strateji.az saytına müsahibə verib.
- "Şamaxı" ilə matçda xal götürmək üçün nə çatmadı?
- Oyuna ciddi hazırlaşmışdıq, məqsədimiz 3 xal qazanmaq idi. Matçın ilk dəqiqələrində vəziyyət istədiyimiz kimi idi, oyuna nəzarət edirdik. Təəssüf ki, dominantlığımızı davam etdirə bilmədik və rəqib top saxlamağa başladı. Nəticədə əllərinə düşən fürsətlərdən maksimum istifadə etdilər. Biz isə qol vura bilmədik. Qısası meydanda istədiyimiz oyunu sərgiləyə bilmədik.
- Ötən həftə kubokda "Qarabağ"a məğlub olduz, bu gün isə "Şamaxı"ya ardıcıl məğlubiyyətlər komandada psixoloji böhran yaratmayacaq?
- Kubok bizim üçün əsas məqsəd deyildi. Hazırda başlıca hədəfimiz Premyer Liqada qalmaqdır və bunun üçün mübarizə aparırıq. Ardıcıl məğlubiyyətlər bizi sarsıda bilməz. Sadəcə səhvlərimizdən maksimum dərs çıxarmalı qarşıdakı oyunlara yaxşı hazırlaşmalıyıq.
- "Şamaxı" ilə matçda sona qədər ehtiyatda qaldın. Zədən var yoxsa baş məşqçinin seçimidir?
- Baş məşqçinin qərarıdır.
- Elitada qalmaq çətin olmayacaq?
- Biz bütün gücümüzü ortaya qoyacağıq ki, I Liqaya yuvarlanmayaq. Odur ki, qarşıdakı oyunlarda qələbəyə köklənəcəyik.
// ABDULLA İSMAYILOĞLU, Strateji.az