Geriyə qayıt Çap et

Kamran İsmayılov: "İşləyiriksə, döyüşürüksə, deməli inam var"

 "Şamaxı" XXV turda "Səbail" səfərində qələbə qazanıb. Bununlada bölgə təmsilçisi bir qədər təhlükəli zonadan uzaqlaşdı. Həmin görüşdə "şirlər"in meneceri Kamran İsmayılov tribunadan dayanmadan komandasına dəstək verənlərdən idi. Strateji.az olaraq həm matç, həm də gələcək planlarla bağlı Kamran müəllimlə söhbət etdik. 

- Kamran müəllim son turda komandanız "Səbail" ilə qarşıdurmadan üzü ağ çıxdı. Qələbəylə bağlı fikirləriniz maraqlıdır...

- Bizim üçün çox ağır qarşılaşma olacağını bilirdik. Premyer Liqada qalmaq uğrunda mübarizədə "Səbail" əsas rəqiblərimizdən biridir, belə oyunlara 6 xallıq matç kimi yanaşırıq. Meydanda yaxşı mübarizə aparıb, qalib gəldiyimizə görə çox sevincliyik. 

- Qış fasiləsindən sonra çempionatda gərginlik daha da artıb, üzərinizdəki təzyiq sizi qorxutmur? 

- Çox düzgün vurğuladız, yeni ildən sonra Premyer Liqada intriqa daha da kəskinləşib. Hətta deyərdim ki, ikinci "5-lik"də gedən komandalar arasında daha güclü, qızğın qarşıdurma gedir. Bu komandalara daha çoz xal qazanır, nəinki ilk "5-lik" klubları. Təbii ki, üzərimizdə təzyiq var, işimiz çətindir. Amma hər bir birimiz məsuliyyətimizi anlayırıq və sona kimi elitada yerimizi təmin etmək uğrunda vuruşacağıq. 

- Komandada hazırda hansı yeni fəaliyyət planları var? 

- Bizim həmişə başlıca məqsədimiz peşəkarlaşmaq yolunda addımlar atmaq, həm ölkə, həm də dünya futbolu ilə ayaqlaşmaqdır. I Liqada da mübarizə aparanda başlıca amalımız bu idi. Azərbaycan futbolunda təşkil olunan hər bir tədbirlərdə və dəyirmi masalarda iştirak edirik və edəcəyikdə. Amma hazırda klubumuzda xüsusi yeni plan və layihələr yoxdur. Başlıca hədəfimiz çempionatda əzmkarlıq göstərib, maksimum xallar qazanmaqla sonuncu olmamaqdır.  

- "Şamaxı"nın elitada qalacağına inanırsızmı? 

- Bizim mübarizəmizdə başlıca məqsəd inamdır və bunun sayəsində yola çıxmışıq. İşləyiriksə, döyüşürüksə, deməli inam var.  

//ABDULLA İSMAYILOĞLU,Strateji.az