Bu gün Azərbaycan Premyer Liqasının XXVI turuna "Araz-Naxçıvan" – “Qarabağ” görüşüylə start verilib. 3 qolun qeydə alındığı oyunda qonaqlar qalib gəlib. Matçdan sonra "atlılar"ın müdafiəçisi Bəhlul Mustafazadə Strateji.az saytına müsahibə verib.
- Bu gün gərgin matç alındı, 90 dəqiqəylə bağlı təəssüratların maraqlıdır...
- Həqiqətən də çox çətin oyun alındı. "Araz-Naxçıvan"ın necə mübariz komanda olduğu hamıya yaxşı məlumdur, oyunda da hesabı da onlar açdı. Buna baxmayaraq ruhdan düşmədik və qarşılaşmada geridönüş edərək 2:1 hesablı vacib səfər qələbəsi qazandıq. Düşünürəm ki, bu gün azarkeşlər də matçdam zövq aldılar. Qarşıdakı kubok oyununda da "Araz-Naxçıvan" ilə görüşəcəyik. Odur ki, bizi daha ağır və maraqlı 180 dəqiqə gözləyəcək.
- Kubokda naxçıvanlıların sizdən qisas alacağından qorxmursan?
- İstənilən klub meydana qələbə əzmiylə çıxır, o cümlədən biz də. Məncə, kubokda daha çətin olacaq, amma biz qələbəyə köklənəcəyik.
- "Qarabağ" futbolçuları nizam-intizamı ilə seçilir. Buna rəğmən bu gün rəqiblə meydanda qarşıdurma yaşandı . Nə baş verdi?
- Səmimi deyim ki, epizoda çoxda yaxın deyildim, ona görə dəqiq nə baş verdiyini görmədim. Amma komanda yoldaşlarımın dediyinə görə futbolçumuza qarşı aşkar zərbə olduğundan ara qarışdı. Çünki Musa Qurbanlı da aqressiv insan deyil ki, durduq yerə çoşsun. İstənilən halda futbol emosialar oyunudur və bu insidenti çox şişirtmək düz deyil. Futbol matçlarında belə hallar tez-tez baş verir.
- İmişlidə futbol coğrafiyası genişlənir. I Liqada mübarizə aparan "İmişli" elitaya can atır, II Liqada "Kür Araz" çıxış edir. Bu həftə start götürən Region Liqasında da daha iki İmişli təmsilçisi yarışacaq. İmişlidən olan biri kimi bu barədə nə deyərdin?
- Doğma yurdumun həm I, həm də II Liqada mübarizə aparan komandalarının oyunlarını, nəticələrini izləyirəm. Çox istəyirəm ki, gələn mövsümdə elitada "İmişli" mübarizə aparsın. Region Liqasında da təmsilçilərimizin artmasına ancaq sevinə bilərəm.
- Qarşıdan yığmanın yoldaşlıq oyunları gəlir. Böyük ehtimal dəvətlilər sırasında olacaqsan...
- Millinin istər yoldaşlıq, istərsə də qrup matçlarına həmişə ekstra ciddi hazılaşıb qələbə qazanmağı hədəfləyirik. Düşünürəm ki, bu sınaq matçlarının bizə çox faydası olacaq.
// ABDULLA İSMAYILOĞLU, Strateji.az