Azərbaycan Premyer Liqasının XXVI turunun qapanış oyunu “Neftçi”-“Turan” qarşıdurması ilə reallaşıb. Gərgin keçən 90 dəqiqədə qonaqlar 70 dəqiqə azlıqda oynasalar da, matçın son dəqiqələrində bərabərlik qolunu vurub, məğlubiyyətdən qaçdılar. "Boz qurd"un üzvü Orxan Əliyev görüşlə bağlı Strateji.az saytına danışıb.
- Gərgin 90 dəqiqəylə bağlı təəssüratların maraqlıdır...
- Bizim üçün çox çətin matç oldu, istədiyimiz kimi oyuna qoşulmadıq. Buna baxmayaraq pessimizmə qapılmadıq, dirəşdik, döyüşdük və məğlubiyyətdən qaçıb vacib bir xal qazandıq.
- Qırmızı vərəqə planlarınızda nələri dəyişdi?
- Əlbəttə ki, belə tez on nəfərlə qalmağı heç düşünçürdük. Emmanuel Hakkmanın qırmızı vərəqə almasından sonra taktikamızda ciddi dəyişiklik yarandı. Kreativ futboldan çox ehtiyatlı oyuna və qapımızın toxunulmazlığı əsas şərt oldu. Belə olduqda mən əvəzləndim və yerimə müdafiəyə meyilli oyunçu çıxdı.
- Erkən əvəzlənmənə görə üzülmədin?
- Təbii ki, çox oynamaq istəyirdim. Amma matçdakı reallığı nəzərə alsaq, baş məşqçimizin qərarı düzgün idi. Əsas komandamızın nəticə qazanmasıydı.
- Qələbəyə bərabər heç-heçə qazandığınızı düşünürsənmi?
- . Biz 70 dəqiqədən çox on nəfərlə mübarizə apardıq. Oyunun sonlarına doğru qol buraxdıq, matça əlavə olunan dəqiqələrdə isə vacib qol vurub məğlubiyyətdən qaçdıq. Odur ki, bu adi heç-heçə deyil, qələbəyə layiq bir xal qazandıq.
- "Turan Tovuz"un ansamblına tam uyğunlaşmısanmı?
- Düşünürəm ki, arzuladığım formaya düşmək üçün bir qədər də zamama ehtiyac var.
// ABDULLA İSMAYILOĞLU, Strateji.az