Cənubi Koreyada keçmiş Prezident Yun Suk Yolun vəzifəsindən azad olunmasından sonra ölkə yeni siyasi mərhələyə qədəm qoyur. Strateji.az "haberler.com" saytına istinadən xəbər verir ki, rəsmi açıqlamaya əsasən, növbəti prezident seçkiləri 3 iyun 2025-ci il tarixində baş tutacaq.
Mərkəzi Seçki Komissiyasının məlumatına görə, namizədlər öz müraciətlərini ən geci 11 may tarixinədək təqdim etməlidirlər. Rəsmi seçki kampaniyası isə 12 mayda başlayacaq və səsvermə gününə qədər davam edəcək.
Yerli müşahidəçilər və beynəlxalq analitiklər bu seçkiləri yalnız bir liderin seçilməsi kimi deyil, həm də Cənubi Koreyanın demokratiya modeli və regional siyasətə təsiri baxımından önəmli mərhələ kimi qiymətləndirirlər.
Xatırladaq ki, Yun Suk Yol konstitusiyaya zidd hərəkətləri və siyasi səlahiyyətlərini aşması səbəbilə parlamentin qərarı ilə vəzifədən azad edilib. Bu, ölkə tarixində nadir hallarda baş verən hadisələrdəndir və siyasi sistemdə ciddi dəyişikliklərə səbəb ola bilər.
//Nəzərbəy Hacıağayev, Strateji.az