Rusiyanın dövlət informasiya agentliyi Ria Novosti, 15 aprel səhəri Telegram sosial şəbəkəsində Ukrayna ərazisinə pilotsuz uçuş aparatları (PUA) ilə hücumların həyata keçirildiyini əks etdirən iki paylaşım edib.
Strateji.az Türkiyənin "Hürriyət" qəzetinə istinadən xəbər verir ki, həmin paylaşımlarda, Moskva şəhərinin işgüzar bölgəsində yerləşən "Moscow City" kompleksindəki bir mənzildən idarə olunan PUA-ların Ukrayna şəhərlərini hədəfə aldığı bildirilirib.
İlk paylaşımda iddia edilib ki, "Moskva şəhərindən idarə olunan döyüş PUA-sı, ilk dəfə olaraq uzaq məsafədən Ukrayna Silahlı Qüvvələrinin Çasiv Yar şəhərindəki bir hədəfini vurub".
İkinci paylaşımda isə hücumun Ukraynanın Donetsk vilayətində yerləşən Baxmut şəhərində, Rusiya tərəfdarı olan radikal sağçı "Espanola" Briqadasının mövqelərindən başladıldığı qeyd olunub.
90 dəqiqə sonra silindi
Paylaşımlara əlavə olunan ümumilikdə 6 dəqiqəlik videolarda PUA hücumunun koordinasiyası ətraflı şəkildə göstərilib. Kadrlarda partlayış səhnələri ilə yanaşı, bir hərbçinin "Komandan Moskva şəhərində oturarkən hədəfi vurdu. Operator heç bir psixoloji təzyiq hiss etmədi. Özünü tam təhlükəsiz hiss edirdi" sözləri eşidilir.
Videoda çıxış edən digər bir şəxs isə PUA müharibəsinin əhəmiyyətini xüsusi vurğulayıb. Lakin bu iki paylaşım yayımlandıqdan cəmi 90 dəqiqə sonra silinib.
"Espanola" briqadası məlumatları təsdiqlədi
Ria Novosti-nin Telegram paylaşımı, daha sonra "Espanola" briqadasının öz rəsmi Telegram kanalında da yayımlanıb.
Paylaşımda bildirilir ki, hücumda istifadə olunan PUA, briqadanın "İspan" ləqəbli komandiri Stanislav Orlov tərəfindən idarə olunub və o, "Moskva şəhərində kirayə tutduğu mənzildə oturaraq hədəfi uğurla vurub".
Rusiya ordusu Xerson şəhərini bombaladı
Digər tərəfdən, Xerson Regional Hərbi Administrasiyası Rusiya ordusunun Xerson şəhərinin mərkəz hissələrinə intensiv hava hücumları təşkil etdiyini açıqlayıb.
Rəsmi məlumatda bildirilir ki, hücumlar əvvəlcə mülki yaşayış məntəqələrini hədəfə alıb, daha sonra isə hadisə yerinə çatan təcili yardım qruplarına top atəşi açılıb.
Saldırılar nəticəsində 1 nəfər həyatını itirib, 3 nəfər isə yaralanıb. Hücum zamanı bir idman kompleksi, supermarket, mülki avtomobillər və çoxsaylı mənzillər ziyan görüb.
Ukraynalı rəsmilər bildirirlər ki, hadisədən dərhal sonra bölgədə təhlükəsizlik və tibbi yardım xidmətləri fəaliyyətini davam etdirir.
//Nəzərbəy Hacıağayev, Strateji.az