Venesiyanın bələdiyyə rəhbərliyi, UNESCO-nun Dünya İrsi Siyahısında yer alan şəhəri həddindən artıq turizmdən qorumaq məqsədilə tətbiq olunan yeni ödəniş sisteminin detallarını açıqlayıb. Strateji.az Türkiyənin "Hürriyyət" qəzetinə istinadən xəbər verir ki, rəsmi açıqlamaya görə, bu sistem əsasən izdihamlı dövrlərdə şəhərə günübirlik gələn turistlərin sayını nəzarətdə saxlamağı hədəfləyir.
Bu ilki tətbiqdə ən diqqətçəkən dəyişiklik isə son dəqiqə rezervasiyalarına əlavə haqqın nəzərdə tutulmasıdır. Belə ki, turistlər şəhərə səfərlərindən ən azı üç gün əvvəl onlayn platforma vasitəsilə 5 avroya giriş bileti əldə edə biləcəklər. Ancaq son anda müraciət edənlər üçün bu məbləğ ikiqat artırılaraq 10 avroya çatacaq.
Yeni ödəniş sistemi 18 aprel – 27 iyul tarixləri arasında, əsasən həftəsonlarına təsadüf edən 54 gün ərzində qüvvədə olacaq. Şəhər rəhbərliyi bu tarixlərin turist axınının ən yüksək səviyyədə olduğu dövrü əhatə etdiyini vurğulayıb.
//Şəfa Yusifzadə, Strateji.az