İranın nüvə proqramına dair narahatlıqların yenidən artdığı bir dövrdə İsrail ordusu önəmli bir addım atıb. Strateji.az "CNN Türk"ə istinadən xəbər verir ki, İsrailin dövlət yayımçısı Kan News-in verdiyi məlumata görə, Hava Qüvvələri 2024-cü ilin aprel və oktyabr aylarında İran tərəfindən hədəf alınan bazalara edilə biləcək hücum ssenarilərini məşq edib. Tatbikatın məqsədi, ABŞ ilə İran arasında nüvə danışıqlarının uğursuzluğa düçar olması halında İsrailin müdafiə qabiliyyətini artırmaq kimi açıqlanıb.
Keçən həftə" New York Times"da yayımlanan xəbərdə isə İsrail və ABŞ-ın İrana qarşı ortaq hücum planı hazırladığı, lakin bu planın o dövrdəki ABŞ Prezidenti Donald Tramp tərəfindən əngəlləndiyi iddia olunmuşdu. Xəbərə görə, həmin hərbi əməliyyat planı İranın nüvə fəaliyyətlərinə birbaşa müdaxiləni nəzərdə tuturdu. Lakin Vaşinqtonun qəfil geri çəkilməsi Tel-Əvivdə narazılıqla qarşılanıb.
İsrailli rəsmilər sızdırılan bu məlumatın ABŞ tərəfindən İrana qarşı bir "danışıqlarda təzyiq" taktikası olduğunu düşünür. Bu həssas dövrdə yayılan sızıntının Tehranı nüvə proqramında güzəştə məcbur etmək məqsədi daşıdığı ehtimal olunur.
"İRAN DÜNYANIN ƏN BÖYÜK DÜŞMƏNİDİR"
İsrail Xarici İşlər nazirinin müavini Şarren Haskel isə İranı dünyadakı ən böyük düşmən olaraq xarakterizə edib.
"İranın nüvə silahı ola bilməz və bu, qarşımızda duran əsas məsələdir. Bunun təkcə İsrail üçün deyil, bütün dünya üçün təhlükə olduğunu anlayırıq. İsrail Yaxın Şərqdə sabitliyi təmin edən qüvvədir. İran isə ətrafındakı bütün xalqları qeyri-sabitliyə sürükləyən, silahlandıran və terrora təşviq edən qüvvədir. Biz nələr yaşadığımızı bilirsinizmi? Sadəcə İsrail xalqı deyil, Livan, İran, Yəmən xalqları da azadlıq, qida, iqtisadi rifah üçün mübarizə aparırlar. Bunu kim əngəlləyir? İran. Bu, bu gün dünyanın üzləşdiyi ən böyük düşməndir."-deyə Şarren Haskel bildirib.
//Nəzərbəy Hacıağayev, Strateji.az