"Qan Donorları Assosiasiyası" İctimai Birliyi fəaliyyətində yeni mərhələyə başlayır. Bunu "Qan Donorları Assosiasiyası" İctimai Birliyinin sədri Fuad Əsgərov Strateji.az saytına açıqlamasında bildirib.
Fuad Əsgərov qeyd edib ki, öncəki illərdə qan donorluğunun təbliğini prioritet istiqamət seçən birlik hazırda qohum nikahlarının yarada biləcəyi mənfi fəsadlar haqqında ictimai maarifləndirmə aksiyalarına başlayacaq.
"Azərbaycanda yaxın qohum nikahları (əmi, xala, bibi və dayı uşaqları arasında) iyun ayından etibarən rəsmi şəkildə qadağan ediləcək. Ailə Məcəlləsinə edilən dəyişikliklə bu cür nikahların bağlanması və dövlət qeydiyyatına alınması hüquqi cəhətdən mümkün olmayacaq. Sözsüz ki, cəmiyyətdə bu qərarın icrası birmənalı qarşılanmayacaq. Yaxın qohumlar arasında nikah halları və onların törətdiyi fəsadlar digər ölkələrdə olduğu kimi, bizim cəmiyyətimizdə də narahatlıq doğuran aktual ailə məsələlərindən biridir. Belə nikahların baş verməsi bir çox hallarda sağlamlıq imkanları məhdud olan uşaqların dünyaya gəlməsinə və nəticədə sosial cəhətdən həssas qrupların sayının artmasına səbəb olur. "-deyə "Qan Donorları Assosiasiyası"nın sədri qeyd edib.
Fuad Əsgərov onu da qeyd edib ki, son illərin açıqlanan statistik göstəriciləri artıq SOS siqnalının vacibliyini gündəmə gətirir.
"Biz də öz növbəmizdə mövzunun aktuallığını nəzərə alaraq bu istiqamətdə fəaliyyətimizi genişləndirəcəyik."-deyə Əsgərov qeyd edib.
//Nəzərbəy Hacıağayev, Strateji.az