Azərbaycanın zəngin milli mətbəxi əsrlər boyu formalaşmış kulinariya ənənələrini, xalqın həyat tərzini və mədəni dəyərlərini özündə əks etdirən ən qiymətli qeyri-maddi mədəni irs nümunələrindən biridir. Qeyri-Maddi Mədəni İrsin Təbliği İctimai Birliyinin icraçı direktoru, sənətşünas Afət Rüstəmbəyova bildirib ki, milli mətbəxin qorunması və təbliği xalqımızın tarixi irsinin yaşadılması baxımından xüsusi əhəmiyyət daşıyır.
Afət Rüstəmbəyovanın sözlərinə görə, Azərbaycan mətbəxi yalnız müxtəlif yeməklərdən ibarət deyil, o, xalqımızın qonaqpərvərlik ənənələrini, ailə dəyərlərini, mərasim mədəniyyətini və bölgələrimizin zəngin kulinariya irsini özündə birləşdirən mühüm mədəni sərvətdir. Hər bir bölgənin özünəməxsus yeməkləri, bişirmə üsulları və süfrə ənənələri Azərbaycanın mədəni müxtəlifliyini nümayiş etdirir.
O qeyd edib ki, Qeyri-Maddi Mədəni İrsin Təbliyi İctimai Birliyi milli mətbəx irsinin araşdırılması, təbliği və gələcək nəsillərə ötürülməsi istiqamətində həyata keçirilən təşəbbüslərə xüsusi önəm verir. Bu məqsədlə milli kulinariya ənənələrinin tanıdılması, yerli məhsulların və qədim reseptlərin qorunması, eləcə də bu sahədə fəaliyyət göstərən ustaların və tədqiqatçıların dəstəklənməsi vacib hesab edilir.
Sənətşünas vurğulayıb ki, müasir dövrdə milli mətbəxin tanıdılması mədəni diplomatiyanın mühüm istiqamətlərindən birinə çevrilib. Azərbaycan mətbəxinin beynəlxalq festivallarda, sərgilərdə və müxtəlif mədəni platformalarda təqdim olunması ölkəmizin zəngin mədəni irsinin dünya ictimaiyyətinə tanıdılmasına mühüm töhfə verir.
Afət Rüstəmbəyova bildirib ki, milli mətbəx yalnız keçmişdən miras qalan kulinariya nümunələri deyil, həm də cəmiyyətin sosial həyatını, ailə münasibətlərini və milli kimliyini əks etdirən canlı mədəni irsdir. Bu baxımdan gənc nəslin milli mətbəx ənənələri ilə tanış olması, qədim reseptlərin öyrənilməsi və ailə kulinariya mədəniyyətinin qorunması böyük əhəmiyyət daşıyır.
Qeyri-Maddi Mədəni İrsin Təbliği İctimai Birliyi bundan sonra da Azərbaycan milli mətbəxinin qorunması və təbliği istiqamətində fəaliyyətini davam etdirəcək, kulinariya irsinin öyrənilməsi və tanıdılması ilə bağlı yeni layihələr həyata keçirəcək, bu sahədə çalışan mütəxəssislərlə əməkdaşlığı genişləndirəcək. Birliyin əsas məqsədi Azərbaycanın zəngin kulinariya irsini gələcək nəsillərə çatdırmaq və onu beynəlxalq səviyyədə daha geniş tanıtmaqdır.