Geriyə qayıt Çap et

Afət Rüstəmbəyovanın yeni nəşri milli irsin az tədqiq olunan səhifələrini işıqlandırır

  

Sənətşünas Afət Rüstəmbəyovanın müəllifi olduğu “Milli Azərbaycan Tarixi Muzeyinin “sehrli” kolleksiyası: Amulet, həmayil və dualar” adlı kataloq 2023-cü ildə Bakıda “Aspoliqraf” nəşriyyatında çap olunmuşdur. Nəşr Milli Azərbaycan Tarixi Muzeyinin zəngin kolleksiyası əsasında hazırlanmış və muzeyin elmi nəşrləri sırasında mühüm yer tutur. 

Kataloqda muzeyin Arxeologiya, Etnoqrafiya və Xüsusi fondlarında qorunan qədim amuletlər, həmayillər, dualar və digər dini-mistik təyinatlı eksponatlar elmi baxımdan təqdim edilir. Daş, metal, keramika və digər materiallardan hazırlanmış bu nadir nümunələr Azərbaycan xalqının qədim inanclarını, mənəvi dünyasını və dini-mədəni ənənələrini əks etdirən qiymətli irs nümunələridir. 

Afət Rüstəmbəyova kataloqda eksponatların tarixi, istifadə məqsədi, bədii xüsusiyyətləri və etnoqrafik əhəmiyyətini elmi əsaslarla şərh edir. Nəşrdə həmçinin qoruyucu simvolların, dini-mistik əşyaların və yazılı duaların xalqın gündəlik həyatında tutduğu yer, onların mənəvi və mədəni dəyəri barədə geniş məlumat verilir.

Qeyri-Maddi Mədəni İrsin Təbliği İctimai Birliyi hesab edir ki, belə nəşrlər Azərbaycanın zəngin mədəni irsinin öyrənilməsi, qorunması və gələcək nəsillərə çatdırılması baxımından mühüm əhəmiyyət daşıyır. Afət Rüstəmbəyovanın bu əsəri təkcə muzeyşünaslar və tarixçilər üçün deyil, həm də milli-mənəvi dəyərlərimizə maraq göstərən hər bir oxucu üçün qiymətli elmi mənbədir.

Milli mədəni irsin sistemli şəkildə tədqiqi və ictimaiyyətə çatdırılması Azərbaycanın tarixinin, etnoqrafiyasının və mədəni yaddaşının daha dərindən öyrənilməsinə xidmət edir. Bu baxımdan Afət Rüstəmbəyovanın hazırladığı kataloq elmi və mədəni əhəmiyyətinə görə xüsusi dəyərə malik nəşrlərdən biridir.