Geriyə qayıt Çap et

Vətəndaş cəmiyyətinin inkişafına doğru: Qeyri-Hökumət Təşkilatlarına Dövlət Dəstəyi Agentliyinin Lənkəranda təşkil etdiyi üç günlük təlim

 

“Əlilliyə Erkən Yardım Portec Şəbəkəsi” İctimai Birliyi
QHT-lərin bilik və bacarıqlarının artırılması onların cəmiyyətin həyatında daha fəal iştirakını təmin edir, sosial problemlərin həllinə professional yanaşmanın formalaşmasına, yeni ideyaların yaranmasına, iştirakçılığın güclənməsinə töhvə verir. 15–17 oktyabr 2026-cı il tarixlərində Lənkəran şəhərində keçirilən “QHT-lərin VII İnkişaf və Mübadilə Proqramı” da QHT nümayəndələrinin peşəkar biliklərini artırmaq, layihələrin hazırlanması sahəsində bacarıqlarını inkişaf etdirmək, həmçinin müxtəlif təşkilatlar arasında əməkdaşlıq əlaqələrini gücləndirmək məqsədini daşıyan təşəbbüslərdən biridir.
Üç gün ərzində QHT nümayəndələrinə layihələrin düzgün planlaşdırılması, ehtiyacların müəyyənləşdirilməsi, problemin qoyuluşu, statistic məlumatlarla əsaslandırılması, nəticələrin qiymətləndirilməsi və ictimaiyyətlə effektiv ünsiyyətin yaradılması və, nəhayət, büdcənin düzgün planlaşdırılması ilə bağlı peşəkar təlimçilər tərəfindən maraqlı və faydalı məlumatlar verildi. Qeyd etmək istəyirəm ki, QHT-lərin uğurlu fəaliyyəti yalnız təşəbbüslərin irəli sürülməsi ilə məhdudlaşmamalıdır, bu baxımdan, Proqram çərçivəsində verilən məlumatlar, vətəndaş cəmiyyətinin nümayəndələrinin, xüsusilə gənc nəslin səriştəsinin və peşəkarlığının artması üçün atılan mühüm addımlardan biridir. İnanırıq ki, əldə olunan biliklər  gələcək layihələrin daha peşəkar yazılmasında, mövcud problemlərin həllində və fəaliyyət istiqamətlərinin daha dəqiq müəyyənləşdirilməsində bütün iştirakçılar üçün faydalı olacaq.
Mübadilə Proqramlarını iştirakçılar üçün yeni biliklər, şəbəkələşmə, gələcəkdə yeni əməkdaşlıqlar  imkanları əldə etməklə yanaşı, nəsillərarası dialoqun yaranması üçün çox faydalı bir platforma kimi də qiymətləndirmək olar.  İştirakçılar üçün yaş məhdudiyyətinin qoyulmaması mənim diqqətimi cəlb edən ən xoş məqamlardan oldu. Mənim üçün bu yanaşmanın ən mühüm tərəfi gənc nəslə verdiyi ismarıcdır. İnsan hansı yaşda olmasından asılı olmayaraq öyrənməyə, özünü inkişaf etdirməyə və yeniliklərə açıq olmağa davam etməlidir. Bu yanaşma  nəsillərarası əlaqələrin güclənməsi, təcrübənin ötürülməsi və ömürboyu təhsilin, öyrənmənin əhəmiyyətini önə çəkmək üçün vacib məqamdır. Hər iki tərəfin bir-birindən öyrənəcəyi yanaşmalar, təcrübələr, biliklər var. Belə ki, gənc nəslin yeni texnologiyalar, yanaşmalar, nəzəriyyələr sahəsindəki bilik və bacarıqları ilə yaşlı nəslin təcrübəsinin vəhdəti hər iki tərəfin fəaliyyət sahəsində daha böyük uğurlara imza atmaq üçün faydalı ola bilər.
Düşünürəm ki, bu təlimin bizə verdiyi əsas mesajlardan  biri də budur: insanın öyrənmə yolu heç vaxt bitmir. Əsas məsələ yaşımız deyil, öyrənməyə nə qədər açıq olmağımızdır. Çünki öyrənməyə davam etdikcə həm özümüz inkişaf edirik, həm də ətrafımızdakı insanlara yeni imkanlar yaradırıq.
Bəzən belə tədbirlərdə öyrəndiyimiz ən dəyərli yenilik təkcə yeni biliklər olmur. Bəzən eşitdiyimiz bir fikir, fərqli bir yanaşma və ya yeni bir baxış bucağı belə düşüncələrimizə təsir edir və bizə bəzi məsələlərə başqa cür yanaşmağı öyrədir.
“QHT-lərin VII İnkişaf və Mübadilə Proqramı” nı təşkil etdiyi üçün QHT Agentliyinə təşəkkürümüzü bildiririk.

Gülnarə Pənahova
“Əlilliyə Erkən Yardım Portec Şəbəkəsi” İctimai Birliyinin sədri

.