Geriyə qayıt Çap et

Portec Şəbəkəsinin sədri QHT-BİZNES tərəfdaşlığı üzrə təlimdə iştirak edib

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə Prioritet Sosial İqtisadi Araşdırmalar İctimai Birliyinin təşkil etdiyi “QHT-BİZNES tərəfdaşlığının gücləndirilməsi: sosial məsuliyyət üçün birgə təşəbbüslər” layihəsi çərçivəsində növbəti təlim keçirilib.
Təlimdə Əlilliyə Erkən Yardım Portec Şəbəkəsi İctimai Birliyinin sədri Ülviyyə Mirzəyeva iştirak edib.Layihənin əsas məqsədi biznes sektoru ilə vətəndaş cəmiyyəti arasında əməkdaşlığın əhəmiyyətini artırmaq, Korporativ Sosial Məsuliyyət (KSM) strategiyasına uyğun birgə təşəbbüsləri təşviq etməkdir.Təlim AmCham Azərbaycanın Dayanıqlı İnkişaf və Korporativ Təsir Komitəsinin sədr müavini Ceyhun Atayev tərəfindən aparılıb.
Təlim zamanı iştirakçılara Azərbaycanda KSM və ESG standartları, şirkətlərlə QHT-lər arasında strateji əməkdaşlıq mexanizmləri, əsas fəaliyyət göstəriciləri (KPI), investisiya əsaslandırmaları, beynəlxalq sosial məsuliyyət və icma layihələri üzrə uğurlu təcrübələr, eləcə də birgə sosial təsir modelləri barədə ətraflı məlumat verilib.İnteraktiv müzakirələr və praktiki qrup işləri formatında təşkil olunan təlimdə iştirakçılar mövzu ətrafında fikir mübadiləsi aparıb, suallarını ünvanlayıblar.Portec Şəbəkəsi üçün bu cür təlimlər sosial sahədə həyata keçirilən təşəbbüslərin dayanıqlılığının artırılması, biznes sektoru ilə əməkdaşlıq imkanlarının genişləndirilməsi və inklüziv layihələrin inkişafı baxımından əhəmiyyətlidir. Təşkilat gələcəkdə də sosial məsuliyyət və tərəfdaşlıq prinsiplərinə əsaslanan təşəbbüslərdə fəal iştirak etməyi hədəfləyir.