Geriyə qayıt Çap et

ABŞ-ın Klivlend şəhərində insan alveri və cinsi zorakılıqla mübarizə sahəsində beynəlxalq təcrübə öyrənilib


 
İnsan alveri və cinsi zorakılıqla mübarizə, zərərçəkmiş şəxslərin müdafiəsi və onların cəmiyyətə reinteqrasiyası sahəsində beynəlxalq təcrübənin öyrənilməsi məqsədilə ABŞ-ın Ohayo ştatının Klivlend şəhərinə işgüzar səfər həyata keçirilib.
Səfər çərçivəsində “Peşəkar Psixoloqlar” İctimai Birliyinin təsisçisi və sədri, psixoloq və mediator Səbinə İsmayılova bir sıra ixtisaslaşmış qurumların fəaliyyəti ilə tanış olub.
Proqram çərçivəsində Cleveland Rape Crisis Center tərəfindən cinsi zorakılıq qurbanlarına göstərilən psixoloji dəstək, hüquqi yardım və maarifləndirmə xidmətləri öyrənilib. Bellefaire JCB təşkilatının uşaqlar, yeniyetmələr və ailələr üçün həyata keçirdiyi psixoloji, sosial və təhsil proqramları, xüsusilə travma və zorakılıqla üzləşmiş şəxslərlə iş təcrübəsi diqqət mərkəzində olub.
Renee Jones Empowerment Center ilə görüş zamanı insan alveri və kommersiya məqsədli cinsi istismardan zərər çəkmiş qadın və qızların reabilitasiyası, fərdi terapiya yanaşmaları, psixososial dəstək və cəmiyyətə reinteqrasiya proqramları ilə tanışlıq baş tutub.
Səfər çərçivəsində hüquq-mühafizə sahəsində insan alveri qurbanlarının müəyyənləşdirilməsi, identifikasiyası, insan alverinin indikatorları və müdaxilə mexanizmləri barədə təqdimat da keçirilib. Larry Henderhan tərəfindən təqdim olunan məlumatlar qurumlararası koordinasiyanın və qurban yönümlü yanaşmanın əhəmiyyətini əhatə edib.
Bununla yanaşı, Case Western Reserve University School of Law ilə görüş zamanı insan alverindən zərər çəkmiş şəxslərə göstərilən hüquqi xidmətlər, hüquqi təmsilçilik və xüsusi məhkəmə mexanizmləri barədə məlumat əldə edilib. Jones Day hüquq şirkətində keçirilən görüşlərdə isə pro bono hüquqi xidmətlərin və özəl sektorun insan alverinə qarşı mübarizədə iştirakı müzakirə olunub.
Səfər zamanı əldə olunan təcrübə insan alveri və cinsi zorakılıq qurbanları ilə işdə kompleks yanaşmanın, psixoloji reabilitasiyanın, hüquqi müdafiənin, sosial dəstəyin və qurumlararası əməkdaşlığın əhəmiyyətini bir daha nümayiş etdirib.
“Peşəkar Psixoloqlar” İctimai Birliyi hesab edir ki, beynəlxalq təcrübənin öyrənilməsi və yerli fəaliyyətə uyğun tətbiqi həssas qrupların müdafiəsi, zərərçəkmiş şəxslərin psixoloji rifahının bərpası və sosial reinteqrasiyası istiqamətində mühüm imkanlar yaradır.
Səbinə İsmayılova
“Peşəkar Psixoloqlar” İctimai Birliyinin təsisçisi və sədri
Psixoloq və mediator