2026 Aprelin 4-də Azərbaycan Gənclər və İdman Nazirliyinin dəstəyi, Azərbaycan Autizm Assosiasiyası və “AzFest Group”un təşkilatçılığı ilə Park Bulvarda II Psixologiya və Loqopediya Festivalı keçirilib.
Festivalda “Peşəkar Psixoloqlar” İctimai Birliyinin sədri, psixoloq və mediator Səbinə İsmayılova da iştirak edib.
Tədbirin əsas məqsədi psixologiya və loqopediya sahəsində fəaliyyət göstərən mütəxəssislərin işlərini ictimaiyyətə təqdim etmək, bu istiqamətdə maarifləndirməni artırmaq və peşəkarlar arasında təcrübə mübadiləsini təşviq etmək olub.
Festival çərçivəsində mütəxəssislər öz praktik fəaliyyətlərini ziyarətçilərə təqdim edib, iştirakçılar üçün faydalı çıxışlar və müzakirələr təşkil olunub.
Tədbirdə millət vəkilləri, vətəndaş cəmiyyəti nümayəndələri, ictimai fəallar, autizmli və digər xüsusi qayğıya ehtiyacı olan uşaqların ailələri, eləcə də dövlət və özəl qurumların nümayəndələri iştirak ediblər.
Bu kimi tədbirlər psixoloji və loqopedik xidmətlərin əhəmiyyətinin ictimaiyyətə çatdırılması, xüsusi qayğıya ehtiyacı olan uşaqların inkişafına dəstəyin gücləndirilməsi və cəmiyyətdə inklüziv yanaşmanın təşviqi baxımından mühüm əhəmiyyət daşıyır.