18 aprel 2026-cı il tarixində İDDO Psixi Sağlamlıq Proqramının təşkilatçılığı ilə Nizami Kino Mərkəzində “II Autizm Maarifləndirmə Forumu – Autizmdə Bütöv Yanaşma” mövzusunda forum keçirilib. Türkiyədən dəvət olunmuş mütəxəssislərin də iştirak etdiyi tədbirdə “Peşəkar Psixoloqlar” İctimai Birliyinin sədri, psixoloq və mediator Səbinə İsmayılova da iştirak edib.
Forumda dövlət qurumlarının nümayəndələri, millət vəkilləri, sahə üzrə mütəxəssislər və Türkiyə Respublikasının Azərbaycandakı səfirinin həyat yoldaşı Zührə Akgün iştirak ediblər.Tədbirdə autizm sahəsində psixoloji xidmətlərin tənzimlənməsi və standartlaşdırılması məsələləri əsas müzakirə mövzularından biri olub. Bu istiqamətdə Standartlaşdırma İnstitutunun yanında psixi sağlamlıq sahəsi üzrə texniki komitənin yaradıldığı, etik kodeksin, diaqnostika və reabilitasiya standartlarının hazırlanmasının planlaşdırıldığı diqqətə çatdırılıb.
Çıxışlarda erkən diaqnostikanın əhəmiyyəti, xüsusilə həyatın ilk ilində inkişaf xüsusiyyətlərinin vaxtında qiymətləndirilməsi və uşaqlarla işdə multidissiplinar yanaşmanın vacibliyi vurğulanıb.Həmçinin Azərbaycan və Türkiyə arasında autizm sahəsində əməkdaşlığın genişləndirilməsi, mütəxəssislər arasında təcrübə mübadiləsinin gücləndirilməsi və müasir yanaşmaların tətbiqi ilə bağlı fikir mübadiləsi aparılıb.
Forum autizm sahəsində maarifləndirmənin artırılması, peşəkar xidmətlərin inkişafı və xüsusi qayğıya ehtiyacı olan uşaqların inkişaf imkanlarının genişləndirilməsi baxımından əhəmiyyətli platforma olub.