Azərbaycan Uşaqları İctimai Birliyinin nəzdində fəaliyyət göstərən uşaq sığınacağında yaşayan uşaqlarla görüş keçirilib. Görüşdə “Peşəkar Psixoloqlar” İctimai Birliyinin sədri, psixoloq və mediator Səbinə İsmayılova da iştirak edib.
Tədbir Türkiyə, Qazaxıstan, Özbəkistan və Belarusun diplomatik nümayəndəlikləri ilə əlaqəli xanımların iştirakı ilə baş tutub. Ziyarət zamanı uşaqlara hədiyyələr təqdim olunub, onlarla səmimi görüş keçirilib.Sığınacaq sakinləri milli rəqslər nümayiş etdirərək Azərbaycan adət-ənənələrini və mədəniyyətini qonaqlara təqdim ediblər.Tədbir çərçivəsində uşaqların əl işlərindən ibarət “İkinci nəfəs” adlı sərgi də nümayiş olunub. Sərgidə uşaqların rəsm əsərləri, tullantı materiallarından hazırlanmış yaradıcılıq nümunələri və əl işi bəzək əşyaları təqdim edilib.
Azərbaycan Uşaqları İctimai Birliyinin sədri Kəmalə Ağazadə qonaqları sığınacaqla tanış edib. Onlara uşaqların yaşayış və istirahət otaqları, oyun məkanları, təlim və konfrans zalı, fotostudiya, eləcə də əl işlərinin hazırlandığı emalatxana haqqında məlumat verilib.Görüş uşaqlara mənəvi dəstək göstərilməsi, onların yaradıcılıq potensialının təşviqi və cəmiyyətdə sosial həmrəyliyin gücləndirilməsi baxımından əhəmiyyət daşıyıb.
“Peşəkar Psixoloqlar” İctimai Birliyi uşaqların sosial və emosional inkişafına dəstək göstərən bu kimi təşəbbüslərdə iştirak etməyi vacib hesab edir.