Geriyə qayıt Çap et

Britaniya Rusiyanın dərinliklərinə zərbələr endirmək üçün Ukraynaya 1000-dən çox dron verəcək

Böyük Britaniya hökuməti Ukraynaya Rusiyanın dərinliklərindəki hədəflərə zərbələr endirmək üçün 1000-dən çox uzaqmənzilli pilotsuz uçuş aparatı (PUA) təqdim edəcək.

Bu barədə Britaniyanın baş nazirinin ofisinin bəyanatında bildirilib.

Məlumata görə, noyabrın 19-da Berlində keçiriləcək Ukrayna üzrə “İstəklilər koalisiyası”nın görüşündə bu yardım paketi elan ediləcək. Dronlar ağır döyüş başlıqları daşıya və 1000 kilometrdən çox məsafə qət edə biləcək. Onlar 260 milyon funt sterlinq (341 milyon dollar) dəyərində yardım paketinə daxil ediləcək.

Britaniya tərəfi bu dronların Ukraynaya cəbhə xəttindən uzaqda yerləşən hərbi istehsal müəssisələrinə və digər hədəflərə zərbələr endirmək imkanı verəcəyini bildirib.

Bundan əlavə, Böyük Britaniya Ukrayna üçün dəniz, logistika və kəşfiyyat dronlarının istehsalını və tədarükünü təşkil edəcək.

Bəyanatda həmçinin bildirilir ki, London Ukraynaya “Lightweight Multirole Missiles” (LMM) çoxməqsədli raketlərinin tədarükünə başlayıb. Ötən ilin martında imzalanmış 1,6 milyard funt sterlinqlik müqaviləyə əsasən, Ukraynaya 5 mindən çox belə raket veriləcək.

Bununla yanaşı, 12 Britaniya şirkəti Ukraynanın “Avengers AI Labs” süni intellekt laboratoriyasının məlumat bazasına çıxış əldə edib. Bu platformada real döyüş şəraitində toplanmış və süni intellekt modellərinin hazırlanmasında istifadə olunan məlumatlar yerləşdirilib. Ümumilikdə 92 Britaniya şirkəti həmin məlumat bazasına çıxış üçün müraciət edib.


Şəfa Yusifzadə