Geriyə qayıt Çap et

Abbas Əraqçi Oman Sultanı ilə görüşüb

İranın xarici işlər naziri Abbas Əraqçi Oman səfəri zamanı apardığı danışıqlar barədə İranın dövlət televiziyasına açıqlama verib.

O, Muskat səfərinin çox uğurlu keçdiyini bildirərək omanlı həmkarı ilə məhsuldar, həmçinin Oman Sultanı ilə mühüm görüş keçirdiyini qeyd edib.

Əraqçinin sözlərinə görə, ikitərəfli münasibətlərlə bağlı ənənəvi müzakirələrlə yanaşı, regiondakı hadisələr müzakirə edilib.

Nazir bu məsələlərdə İranın mövqeyinin Omanlı dostlarının mövqeyi ilə böyük ölçüdə üst-üstə düşdüyünü vurğulayıb.

Əraqçi Oman diplomatiyasının rolu barədə də fikir mübadiləsi apardıqlarını bildirib. O, Omanı diplomatik səylərə qoşulan ilk ölkə kimi xarakterizə edərək bu ölkəyə minnətdarlıqlarını ifadə edib.

Nazir qeyd edib ki, Oman regional diplomatiyada və münaqişələrin həllində həmişə müsbət rol oynayıb və bu rolunu davam etdirir. Onun sözlərinə görə, bu səylər davam etdirilməlidir.

Əraqçi əlavə edib ki, yeni və müstəqil regional təhlükəsizlik çərçivəsinin yaradılması barədə də konstruktiv müzakirələr aparılıb. O bildirib ki, regionda təhlükəsizliyin xarici müdaxilə olmadan, region ölkələrinin öz imkanları hesabına təmin edilməli olduğu barədə fikir getdikcə daha geniş dəstək qazanır.


Şəfa Yusifzadə