Martın 18-də Akademik Zərifə Əliyeva adına Milli Oftalmologiya Mərkəzinin Dəmir yol Səyyar klinikası Bakının Dəmir yolu vağzalında tibbi aksiya keçirib.
Mərkəzin Elmi-məlumat, tədris və təşkilati-metodik bölməsindən verilən məlumata görə, aksiya çərçivəsində 120 nəfər müayinə olunub. Müayinələr əsasında refraksiya patologiyası, allergik konyunktivit, quru göz sindromu və s. xəstəliklər aşkarlanıb.
Aksiyanın keçirilməsində məqsəd əhaliyə yerindəcə xidmət göstərmək, görmə patologiyasının erkən diaqnostikasını aşkarlayaraq həll olunmasına kömək etmək, profilaktik müalicə tədbirləri həyata keçirməkdir. Müayinələr əsasında göz xəstəlikləri ilə bağlı ümumi monitorinqlər aparılır və əldə edilən nəticələr müzakirə edilir.
Müayinələr Akademik Zərifə Əliyeva adına Milli Oftalmologiya Mərkəzinin həkimləri Lalə Məmmədova, Sidiqə Əliyeva, rezident Fidan Mirzazadə tərəfindən aparılıb.
//Strateji.az