Dini Qurumlarla İş üzrə Dövlət Komitəsinin təşkilatçılığı ilə Naxçıvan şəhərində noyabrın 30-da “Dövlət-din münasibətləri: geosiyasi reallıqlar və qlobal çağırışlar kontekstində” mövzusunda konfrans keçirilib.
Konfrans iştirakçıları əvvəlcə xalqımızın Ümummilli Lideri Heydər Əliyevin Naxçıvan şəhərinin mərkəzində ucaldılan abidəsini ziyarət edib, abidənin önünə əklil və gül dəstəsi qoyaraq Ulu Öndərin xatirəsini ehtiramla yad ediblər.
Konfrans Azərbaycan Respublikasının Dövlət Himninin səsləndirilməsi ilə başlayıb. Daha sonra Ümummilli Lider Heydər Əliyev və ölkəmizin müstəqilliyi, ərazi bütövlüyü, suverenliyi uğrunda canlarını qurban verən şəhidlərimizin əziz xatirəsi bir dəqiqəlik sükutla yad edilib. Dövlət Komitəsi və tabeliyindəki Mənəvi Dəyərlərin Təbliği Fondu və “Global Media Group”un birgə ərsəyə gətirdiyi “Həmişə bizimləsiniz” filmi nümayiş olunub.
Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli konfransı giriş sözü ilə açaraq, Ümummilli Liderimiz Heydər Əliyevin rəhbərliyi ilə dini-mənəvi dəyərlərimizin yaşadılması sahəsində həyata keçirilmiş genişmiqyaslı tədbirlərin əhəmiyyətindən danışıb. Heydər Əliyevin böyük səyləri nəticəsində ölkəmizdə vicdan və etiqad azadlığının, dini təhlükəsizliyin təmin edildiyini, sağlam dini ideologiyanın formalaşdığını vurğulayıb. Bildirib ki, bu gün Ümummilli Liderin tövsiyələri əsas götürülərək, Azərbaycanda din siyasəti demokratik dövlət quruculuğu kursuna, eləcə də dövlət-din münasibətlərinin milli-mənəvi və hüquqi müstəvidə tənzimlənməsi prinsipinə uyğun həyata keçirilir.
Dini Qurumlarla İş üzrə Dövlət Komitəsinin sədri Ramin Məmmədov çıxışında Azərbaycanın ötən müddətdə qazandığı nailiyyətləri qeyd edərək, ötən əsrin 90-cı illərində Ulu Öndər Heydər Əliyev tərəfindən məhz bu torpaqlarda – qədim Naxçıvanda başlanan yolu Azərbaycan Prezidenti cənab İlham Əliyevin uğurla davam etdirdiyini bildirib. Qeyd edib ki, qələbələrimizə təminat yaradan ən böyük amillərdən biri milli birliyimizdir. Respublikamızda dövlət-din münasibətlərinin mükəmməl modellərindən birinin yaranmasında cəmiyyətimizdəki dinlərarası harmoniya, birgəyaşayış mühiti mühüm rol oynayıb.
Tədbirin aktual mövzuya həsr olunduğunu deyən Komitə sədri söyləyib ki, xüsusilə indiki geosiyasi reallıqlar qarşımızda duran vəzifələri daha dərindən təhlil etməyə sövq edir. Azərbaycanın son illərdə əldə etdiyi tarixi qələbələr bir çox siyasi dairələri narahat edir. Konfransın əsas missiyası da tarixi nailiyyətimiz olan dövlət-din münasibətləri modelini qorumağa və daha da möhkəmləndirməyə imkan verən ideya və təkliflərin öyrənilməsindən ibarətdir.
Konfransın Naxçıvanda keçirilməsinin xüsusi əhəmiyyətə malik olduğunu bildirən Azərbaycan Respublikası Milli Məclisinin İctimai birliklər və dini qurumlar komitəsinin sədri Fazil Mustafa Muxtar Respublikanın strateji cəhətdən mövqeyindən danışıb. Azərbaycanın dövlət-din münasibətlərinin özünəməxsus quruluşa malik olduğunu bildirən F.Mustafa dövlətin ölkə vətəndaşlarının dini etiqad azadlığına onların hüquq və azadlıqlarının tərkib hissəsi kimi yanaşdığını, Azərbaycan vətəndaşlarının vicdan azadlığı hüququnun ölkə qanunvericiliyində öz əksini tapdığını deyib. Dövlətin dinə qayğısından bəhs edən millət vəkili azad olunmuş ərazilərdə dini abidələrin abadlaşdırılması prosesini xüsusilə qeyd edib.
Qafqaz Müsəlmanları İdarəsinin sədr müavini Bəxtiyar Nəcəfov dövlət başçısı İlham Əliyevin müdrik siyasəti nəticəsində milli-mənəvi dəyərlərin qorunub saxlanılması, inkişafı istiqamətində qurulmuş siyasi ənənənin dinamikasının artdığını vurğulayıb.
Konfrans işini “Dövlət-din münasibətləri: ideoloji təhlükəsizlik müstəvisində” və “Milli-mənəvi dəyərlərə qayıdış: ənənə və müasirlik” mövzusunda panellərlə davam etdirib.
Dini Qurumlarla İş üzrə Dövlət Komitəsinin sədr müavini Gündüz İsmayılovun moderatorluğu ilə keçirilən 1-ci panel “Dövlət-din münasibətləri: ideoloji təhlükəsizlik müstəvisində” mövzusuna həsr olunub. Sədr müavini “Dünyəvi dövlətdə din və ideoloji təhlükəsizlik” mövzusunda təqdimatla çıxış edərək dini kimliyin milli kimliyə qarşı qoyulması, dindar kontingent arasında dünyəviliyin zəiflədilməsi, dinin siyasiləşdirilməsi, cəmiyyətdə qütbləşmənin yaradılması və bu kimi digər cəhdlərin törədə biləcəyi fəsadlara diqqəti çəkib. Bildirib ki, zərərli təbliğatların qarşısının alınması, bu kimi təzahürlərlə effektiv mübarizədə ən uğurlu tədbirlərdən biri də düzgün metodlarla təşkil edilmiş dini maarifləndirmə işinin genişləndirilməsidir.
Ardınca Azərbaycan Respublikası Milli Məclisinin İctimai birliklər və dini qurumlar komitəsinin sədr müavini Sahib Alıyev, Azərbaycan Respublikası Ədliyyə Nazirliyinin Qanunvericilik Baş İdarəsinin əməkdaşı Natiq Mirzəyev, AMEA-nın Naxçıvan Bölməsinin sədri, professor İsmayıl Hacıyev və Naxçıvan Muxtar Respublikası Daxili İşlər Nazirliyinin İctimai Təhlükəsizlik İdarəsinin rəisi Cavid Cəfərovun çıxışları dinlənilib.
Daha sonra “Milli-mənəvi dəyərlərə qayıdış: ənənə və müasirlik” adlı panel sessiya keçirilib. Azərbaycan İlahiyyat İnstitutunun rektoru Aqil Şirinovun moderatorluq etdiyi sessiyada ideoloji risklərin çoxaldığı müasir dövrdə ölkəmizin multikulturalizm və tolerantlıq ənənələrinin möhkəmləndirilməsi istiqamətində qarşıda duran vəzifələr, dinlərarası dialoqun inkişafı ilə bağlı qlobal çağırışlarla əlaqəli mövzular ətrafında çıxışlar dinlənilib. Naxçıvan MR Dini Qurumlarla İş üzrə Dövlət Agentliyinin direktoru Vüqar Babayev, Bakı İlahiyyat Kollecinin direktoru Mehman İsmayılov, Dini Qurumlarla İş üzrə Dövlət Komitəsinin Dini məsələlər üzrə şöbəsinin müdiri Cahandar Əlifzadə və Azərbaycan İlahiyyat İnstitutunun Dinşünaslıq kafedrasının dosenti, Sosiologiya üzrə fəlsəfə doktoru Asəf Qənbərov mövzu ilə bağlı fikirlərini bölüşüblər.
Konfransın yekununda çıxış edən Dövlət Komitəsinin sədri Ramin Məmmədov vurğulayıb ki, Azərbaycanda mövcud olan dövlət-din münasibətləri modeli güclü dövlət, vətəndaş kimliyinə əsaslanan milli həmrəylik və gələcək haqqında cəmiyyətin ümumi mənafelərini ifadə edən baxışlar sistemi üzərində qurulub. Dövlətin məqsədi insanların dini etiqad azadlığı ilə bağlı fərdi seçimlərini nəzarətdə saxlamaq deyil, inanclar və ictimai mənafelərin harmoniyasını qorumaqdır. Azərbaycan qlobal çağırışlar kontekstində mövcud riskləri qiymətləndirərkən mümkün və ya ehtimal olunan təhdidlərin əldə etdiyimiz nailiyyətlər fonunda təhlilini əsas götürür. Bu daha aydın, konkret və faydalı nəticələr çıxarmaq imkanı yaradır. Konfransda aparılan səmərəli fikir mübadiləsinə görə iştirakçılara təşəkkürünü bildirən R.Məmmədov tədbirdə səsləndirilən bütün təkliflərin təhlil olunacağını və nəzərə alınacağını qeyd edib.
Müzakirələrdən sonra konfrans yekunlaşıb.